陳嘉桓儲錢買樓過「長大」生活

頹足一年：想放棄幕前

「我屋企人係做化妝，所以我細個已經成日接觸呢行嘅人。我中一已經有169cm高，14歲做model，中五簽公司，公司幫我揀咗做演員，安排我學功夫。做演員最大得着係可以演活一個人，同埋唔同做model要節食，因為我好鍾意食嘢。」

由於很多時要到外地拍攝，年紀小小的Rose經常離家工作，加上身邊朋友大部分比自己年長，故她亦承認自己太早熟。她很享受與前輩聊天，認為獲益良多。做演員樂趣多，但壓力也很大，早年在內地發生不愉快事件，令Rose自閉了一年：「嗰陣好唔開心，我刪除晒所有社交平台，電話又唔聽，冇工作，冇人搵到我，頹廢咗一年，想放棄幕前工作。後來諗通咗，覺得自己仲細，應該努力做好自己，展望將來，過去咗就算。」

陳嘉桓經常到內地工作，但未必次次有助手跟隨，事無大小也要自己處理，令她養成獨立個性。	陳嘉桓不喜歡小鮮肉，反而鍾情成熟男。	孝順的陳嘉桓將所有收入全奉獻給媽媽。

如果不做藝人，Rose應該會從事跟寵物有關的工作，因為她很喜歡小狗，夢想可以開狗cafe。近年Rose多在內地工作，近日她便參與了兩部電影，分別飾演型格名模及鬼：「原來做鬼仲難過做人，因為做鬼唔可以郁，有一幕我要赤腳行樓梯，但腳趾唔可以亂郁，嗰場戲拍咗好耐，哈哈。」Rose又指已練成金剛不壞之身，身兼司機、助手一腳踢，自己照顧自己。

陳嘉桓母愛氾濫，對弟弟呵護備至，亦非常照顧愛犬。

放大圖片

擇偶條件：矮過我都得

陳嘉桓媽媽在16歲時生下她，陳母年多前再度懷孕，Rose表示當時得知再做姐姐也有點愕然。現時弟弟已13個月大，喜歡小朋友的她與「細B」感情要好：「佢依家開始學行同講嘢，好得意。如果我喺內地做嘢，就會同佢視頻，但有時去太耐，返嚟佢唔認得我，我要入房打視頻畀佢，然後再出番廳，佢先認得番我。」受媽媽影響，她坦言也想結婚生子組織家庭，如果遇到合適對象，更不排除會閃婚：「依家冇拍拖，入行咁耐拍過幾次拖，如果再拍拖，都會低調處理。（擇偶條件？）可能自己比較成熟，所以唔鍾意小鮮肉，鍾意成熟穩重，矮過我都得，但異地戀就唔考慮，因為我覺得兩個人相處係好重要。」

樣子成熟：仲想做校花

常言娛樂圈是個大染缸，但Rose卻沒有被「污染」，是個乖巧的女孩子，所有收入全歸媽媽保管。個性節儉的她刻下目標是密密接工作，儲錢買樓：「嚟緊都想試吓一個人住，真正感受吓『長大』嘅生活。其實依家喺內地工作多咗，認識咗好多朋友，朋友又會介紹工作畀我。內地好鍾意香港嘅演員，所以要好好把握工作機會。不過有人話我雖然仲細，但個樣生得大個，做唔到學生妹，但我仲想做校花。」人細鬼大的Rose，其實可塑性很高。

採訪：Ada Lam

攝影：劉斌

場地：嵐喬日本料理