金剛林子善感同身受戥商戶慘
秋意漸濃，圈中不少蟹王、蟹后都對時令大閘蟹流晒口水，過往亦有不少藝人投資這門利潤甚高的生意，惟早前政府驗出有大閘蟹樣本致癌物超標，令不少蟹癡為之徬徨！去年曾賣大閘蟹的金剛今年「執身彩」冇再投資，但亦戥蟹商慘，而今年首次賣蟹的柯嘉琪卻能逆巿求生！
正值大閘蟹季節，一眾嗜蟹老饕均「喉住」肥美大閘蟹，更有不少蟹商瞄準這兩個月的蟹季開巿賣蟹賺大錢，然而政府日前驗出兩個來自江蘇太湖的大閘蟹樣本致癌物二噁英水平超標，令圈中不少蟹癡心驚膽戰，全港蟹商更為之頭痕！鑑於政府的禁令措施，令飲食業風聲鶴唳。
促政府幫忙
去年曾與友人夾份投資大閘蟹生意的金剛，今年因工作忙而未能分身再經營「蟹業」生意，身在日本工作的他接受電話訪問，問到會否覺得執番身彩，他說：「唔可以咁講，可能有啲貨源都係正貨，正貨當然唔怕食，不過今年我真係冇時間做，如果唔係其實都幾煩！」並戥受影響的香港商戶慘。同樣有搞飲食生意的林子善感同身受，戥賣蟹商戶肉赤：「政府應該幫吓嗰班要銷毁有問題蟹嘅商戶，或者提供津貼！」
至於今年第一次豪擲6位數字嘗試經營大閘蟹生意的碩士女藝人柯嘉琪，剛起步便硬食這場風波，但亦能逆巿求生。她接受本報記者訪問時自言對自己的貨源有信心，更會向顧客出示檢驗報告：「新聞一出的確有影響，多咗客人問我啲蟹得唔得，有朋友叫我趁機加價，但我唔會乘人之危。（生意點？）有錢賺。」
文：影視組