猷啟唔敢學老竇做多情種
賭王何鴻燊與三太的兒子何猷啟近日與五個朋友共出資80萬推出手機遊戲App，首次創業的他，坦言有向父親取經做生意。作為城中「筍盤」，他謙稱自己未達標，因為事業未成，其心目中的「筍盤」是現年95歲的爸爸。他視爸爸為偶像，學習他的成功、他的處世、他的幽默，但笑言遺傳不到爸爸擁有四房的多情本領！
何猷啟是賭王與三太陳婉珍所出的孻子，今年25歲，有一位龍鳳胎姐姐何超蓮及大家姐何超雲。猷啟個性較內斂寡言，這次為了首創的手遊App才破例受訪，並鮮有地分享家庭生活！
老竇教落咪咁易認輸
猷啟說早於兩年前看準手機遊戲有爆發的增長空間，於是與朋友在成都開設主要開發手遊的公司，並將進一步將手遊拓展至亞洲市場，下一站會是台灣。作為賭王之子，猷啟坦言沒有實際幫助：「唔想倚靠屋企嘅影響力去做嘢，今次都係用自己儲嘅錢，佢哋精神上支持我。爸爸教我做人要堅持，唔好咁易認輸。」
父子餵魚時光最難忘
賭王今年已95歲，年前因跌倒而鮮有露面，猷啟表示父親即使行動不便，但思維清晰，也因如此，他特別懷念某年跟爸爸在夏威夷沙灘一起餵魚的時光：「畢竟爸爸大我好多，我出世嗰陣爸爸已經70歲，唔會期望佢同我跑嚟跑去，所以有呢啲時光係幾難忘。」猷啟視父親為學習對象：「佢係個好成功嘅生意人，個人又風趣幽默，好多人都尊敬佢，我絕對係其中一個。（感情方面爸爸有冇畀意見你？）講笑有講話拍多幾個，不過其實只要係好嘅女仔就OK。（依家同女友Angelika感情點？）幾穩定，佢係外國人，不過咩國籍都唔緊要，最緊要溝通到。（會唔會學爸爸有幾個太太或者女朋友？）呢樣肯定唔會，呢樣遺傳唔到，哈哈！」
家族和氣唔會爆爭產
出身大家族，猷啟自覺十分幸運，不用擔心太多，收過最貴重的禮物是澳門的一間豪宅，現時在放租。貴為何家公子，背景豐厚、年輕有為，被視為城中筍盤，對此猷啟卻搖頭否認：「我唔算（筍盤），我欠事業，冇工作經驗，爸爸先係筍盤！」雖然家族有四房人，但他不擔心會發生爭家產的電視劇橋段：「做好自己嗰房嘅嘢就得，冇話爭咩嘅！（同其他兄弟姐妹關係點？）全部都OK，有時都會出嚟玩，平日又會傳訊息聯絡。」三房千金超雲、超蓮一向備受注目，猷啟亦承認兩位姐姐一向多追求者，不過她倆現時都是單身，三姊弟都工作為先，做個非典型的富二代！
採訪：Ada Lam
攝影：黎志輝
髮型：Tony@kr+
服裝：Lanvin
場地：Isola Bar&Grill