黃建東刪惡搞片撲火

藝人黃建東（Derek）惡搞日本洗腦神曲《PPAP》紅遍網絡，早前應網民要求推出第二彈印度版《PPAP》。片中見Derek穿上印度女性服裝及塗黑臉頰化身「印度表姨」，全程以印度口音又唱又跳，期間大騷「飛毛腿」，又擘髀大大啖食雞髀！不少網民都批評短片涉嫌種族歧視，Derek隨即刪除短片「撲火」，前晚更上載中英對照的聲明，表示拍片純粹為觀眾帶來歡笑，強調從未企圖嘲笑、歧視或冒犯任何人或任何民族，對於造成觀眾困擾致歉。不少網民留言力撐，更鼓勵他切勿放棄創作。

承認大意惹負評

Derek昨日出席「Panasonic蒸焗料理終極賽」開幕禮時，再度為事件解畫，他承認拍片時不夠細心：「創作嗰陣冇諗過會有咁嘅反應，反思後覺得唔夠細心，因為種族係比較敏感嘅Topic，所以網上負評多，好多人都唔開心同好嬲。（覺得浪費咗心機？）作為創作人覺得係，下次諗Topic會小心啲，今次係玩吓，冇惡意，有印度人私訊我話覺得反感，真係好抱歉！」

Louisa重提校園欺凌

「十優港姐」麥明詩（Louisa）前日留言指Derek的影片帶有種族主義，她昨日接受本報電話訪問，問到是否對該短片反感？她說：「喺英國讀書時試過畀人歧視，所以特別敏感。（當時點樣畀人歧視？）例如同我對話會用好慢嘅語速講英文，又試過揀科嘅時候，有外國同學認為亞洲人只可以讀科學同數學相關科目，唔可能讀到法律系。」她希望大家不要先入為主為種族定型，又指開玩笑與挖苦只有一線之差，所以說話時應加倍留意，以免造成誤會。

另外，Louisa昨日出席活動時被問及曾向舊愛林作借車，她表示不願雙方淪為陌生人：「人嘅關係唔係燈掣咁樣一啪即熄，因為過去放唔低而變陌生人會好可惜，係唔成熟嘅表現。」

文：專案組