白雲婚宴5連咀預告繼續性感

無綫「神獸天使」白雲與前港男江俊霖(Kelvin)拍拖5年修成正果,昨日在尖沙咀洲際酒店筵開38席宴親朋,藝人陸詩韻及艾威等到賀!身穿低胸婚紗的白雲非常養眼,除與丈夫連咀5次外,受訪時又Sweet爆展示手上的碎鑽戒指,她直言成為人妻心情尚可,只是早上丈夫接新娘時較激動,更爆老公簽字時眼濕濕。

問到婚宴上可有特別環節,白雲說:「一陣會換6套衫,騷少少身材,仲會同老公跳舞,有驚喜畀客人。(蜜月呢?)想12月去,但乜都未訂。(幾時造人?)要等埋伴娘陳芷尤先一齊生,驚生咗唔可以成日去佢屋企瞓,但未知想生幾多個。(做少奶奶?)唔會,有角色啱都想試,會繼續性感。」談及婚照相當趣怪,包括僅以枕頭遮掩重要部位的「床照」、雪地噴血照及多款電影海報造型,白雲透露婚照是2月到瑞士探親時即興拍攝,化妝、Set頭都親自包辦。

劉溫馨接花球

至於成功接花球的姊妹團成員劉溫馨,笑言花球從天而降:「聽講一年內要結婚。(有冇拍拖?)呢啲好私隱,結婚係大件事,依家事業為重。」而另一姊妹朱晨麗則透露早上5點收工後即直奔酒店準備:「頭先喺上面小睡咗一陣。(今朝兄弟團玩笠絲襪,係咪你着過?)梗係唔係!我着過就要嚟收藏啦!希望下次可以搶到花球,搵到個可以結婚嘅男友。」除了笠絲襪外,10位姊妹在早上的接新娘環節中,還在新郎胯下準備食物,由兄弟邊做掌上壓邊食,認真大整蠱!