41歲車婉婉 驗孕班救兵中獎！
現年41歲的車婉婉突然宣布懷胎4個月，以「奇迹」來形容今次人生新里程的她，覺得一切是「冥冥中有主宰」，自爆是「懵炳」大肚婆的她，除「有喜當體虛」外，連驗孕都要請外援幫忙！
前歌手車婉婉於2013年跟中澳混血兒Jonathon結婚後，一直享受二人世界，對生兒育女抱隨緣態度，而剛跟無綫簽了藝員合約的她，打算在視壇大展拳腳之際，「混血B」突然意外駕到，令她又驚又喜，更鬧出不少笑話！昨日她在社交網上載Jonathon錫她4個月肚的溫馨相，並留言：「感謝神，一個奇妙旅程之開始，終於可以和大家分享我們的喜悅…我們Q氏會一切小心努力將BB照顧好。」她接受電話訪問時表示剛「中獎」的7月時，因為「食錯嘢」入院：「又屙又嘔、血壓又去到好低，第一次入醫院，醫生話我好嚴重，唔畀我出院，夾硬出咗院後，覺得自己好似棵黃牙白咁好虛好弱，飲酒、飲咖啡呢啲壞習慣都戒晒。」
唔識睇驗孕棒
口味突變，她仍未覺「身體有異」，之後睇中醫調理身體，聽中醫囑咐多食燉品如雞汁、生果及羊湯後，體質轉好，但由110幾磅瘦到100多磅，且「月事」有誤，她還以為：「嗰時身體咁虛，唔諗住會『有咗』，加上血壓咁低，（月事停）都覺得正常，所以冇理。」直至閨密關心她是否有喜兼在半推半就下她才識去驗孕，她大爆驗孕過程搞笑及烏龍：「我朋友話我個樣太揚，幫我去買驗孕棒，送兩支驗孕棒到我食飯嗰間食肆度，再塞入我個袋，仲壓低聲同我講：『你返到屋企打嚟我嗰度！』」之後她回家匿廁所驗孕，試第一支驗孕棒時心中暗怨：「夾硬要人哋驗，驗完又唔識睇，唔知一條線定兩條線，一條又有，一條又冇，一條好深色，一條矇矇哋。」惟有影驗孕棒給朋友代查證，朋友說她「有咗」，她再試第二支驗孕棒才相信「真的懷孕了」：「未試第二支前，我冇咁多尿屙，立即灌水飲，又入廁所搞一大餐，驗完發現支驗孕棒有一條條嘢眨吓眨吓，一路個心噗噗咁跳，突然彈一個字『pregnant』出嚟。」
老公祈禱咪生女
婉婉稱當時知道懷孕感覺茫然，即時通知在客廳「煲電話粥」的老公：「我同佢話有啲要改變依家就好改變，之後啪一聲啪咗支驗孕棒喺佢手上，老公呆咗。」她指老公表現爆趣，即時上網查閱該驗孕棒準確度，又祈禱希望不是生女。問她老公是否恨仔？她指老公很喜歡小朋友，只是未「適應」將有BB，老公摸她的肚也驚到手震。問到BB性別？她指要12月才知，預產期是明年4月。問她喜歡仔或女？她感恩地說：「仔女都冇所謂，由於時間關係整定咗嘛，只希望佢健康，我都係高齡（產婦），一過40歲都覺得冇乜希望，好似跌咗落灰暗嘅幽谷咁樣！她又稱現時肥了近20磅，仍照常返食肆上班。而本報早前兩度拍得她到銅鑼灣行街購物，見穿上鬆身衫褲及平底鞋的她翹住女友人到超市買健康食品，為肚中BB準備營養餐。
文：音樂組
攝：追蹤組