Aka畫功氹妹妹
少女組合Super Girls隊長Aka唱得跳得，畫畫都有一手，擅長畫inkdrawing zentangle及水彩畫，畫過不少作品的她最喜愛是送給妹妹的一幅畫，她說：「阿妹係我呢世人裏面最了解我嘅，我可以肆無忌憚將所有嘢話畀佢聽，我妹妹係個空姐，佢鍾意自由自在做佢自己嘅嘢，喺兩、三年前佢入職空姐時，我就送咗呢張畫畀佢，一個披住雀仔嘅女仔，好似好舒服、好自由、啲羽毛好靚，佢可以去好多地方影好多相、去見識，每一次見識就好似多一條羽毛。」
Aka很贊成讀萬卷書不如行萬里路，好羨慕妹妹能夠去好多地方增廣見聞，她說：「我因為工作關係，好多時都喺香港，雖然都有去外地做嘢，但唔能夠自由自在好似妹妹咁，可以去啲鄉村、或者去感受當地嘅生活。」她曾經將這幅畫做手機wallpaper一段長時間，她說：「我用咗個幾兩個鐘畫呢幅畫，送畀佢時，佢冇喊，但話好鍾意、好靚，佢都有做手機wallpaper，呢幅畫都係我唯一一幅送畀佢嘅畫，之後我冇再畫畫畀佢。」
