岑麗香女神未必長勝 小三？我啋過你！
外間覺得女神花枝招展，頭戴光環，但被不少男士視為女神的岑麗香，原來也有美麗的煩惱，煉成前更被「小三」擊敗！香香現時與熱戀中的加拿大男友強強分隔千里，但她對男友充滿信心，不擔心再被「小三」乘虛而入。
時刻都靚？都要美圖執執
選美出身的香香，加入無綫後一劇接一劇，甚有觀眾緣。愈來愈索的她，由觀眾至網民都一致封她為「女神」，但原來得天獨厚，也有美麗的煩惱！
「周圍啲人都話我係女神，好多謝呀！但我真係唔覺，我都係普通人，不過咁多人咁講，開頭都有諗吓係咪要扮女神呢？始終化咗妝係靚啲(口架)嘛！咁落街買餸使唔使化妝呢？女神係咪唔可以搭港鐵，要搭的士呢？但落街買餸嗰15分鐘，要早一個鐘頭化妝Set頭，我真係唔想，好唔抵，都係冇咁做。咁落街都會梳吓個頭、刷牙、洗面嘅，都要尊重番大家，最緊要自己舒服先，人哋睇落都會舒服。好似同人影相，如果自己好緊張，人哋都未必影得開心。我做演員就係想娛樂大家，同埋帶畀大家開心正能量，如果我成日都好緊張自己，影完相都要Check吓影得靚唔靚，唔靚可唔可以幫我美圖一下，咁就唔開心啦！不過如果嗰日好樣衰，我可能會叫佢美圖一下先放上網，哈哈！」
瘦身秘技！唔開心就會脹
香香近年愈來愈纖瘦，但瘦得來感覺健康，女人有愛情滋潤，的確分外明艷照人！
「我覺得係瘦咗啲，由拍劇開始，身邊朋友教我好多美容心得，化妝師就教我點樣按摩塊面去瘦面，咩湯水同食物會令皮膚有光澤同去水腫，女人冇一個係醜，只不過係懶，只要努力一定會靚啲！好多人問我點解塊面瘦咗咁多，化妝有幫助，同埋勤力按摩塊面。我開工化妝之前，一定會喺屋企用瘦面按摩器碌下，碌一碌塊面真係冇咁腫，如果好似我咁碌咗5年，淋巴一定會通咗啲，冇咁脹，所以一定要努力！
加拿大興大隻
肥瘦同壓力都有關係，初初嚟香港要適應好多嘢，同埋突然畀咁多人睇住，有啲話要瘦啲，有啲又話要肥啲，好大壓力！後來適應咗放鬆咗，個人反而冇咁脹，同埋加拿大靚嘅標準係大隻啲，依家返去，啲朋友會擔心我係咪營養不良。開頭戒好多嘢唔食，意粉、漢堡包咁，但限制太多會好辛苦，一唔開心我就會脹，後來覺得開心重要啲，鍾意食嘅就食，但唔會過分，食少少滿足自己，唔應該唔健康咁逼自己餐餐只係食沙律，好唔開心(口架)嘛！強強都係加拿大人，佢都慣啲人肥啲。」
結婚生仔？有好多嘢想做
「女神」香香可謂人見人愛、車見車載，但原來「封神」前，她也曾被第三者擊退，雖然聲稱已耐到唔記得，但問到會否擔心與現任男友強強出現第三者，她即大反應地「啋」，莫非仲有陰影？
「喺《為食神探》入面同馬國明係一對，但後來有『小三』黃心穎出現搞破壞。我都試過有第三者，但係太耐嘅事，已經唔記得喇！如果你問我驚唔驚有小三出現，我啋過你把口！唔准講呢啲！哈哈！我對強強有信心！結婚、生仔我都想嘅，但順其自然啦！唔會心急，因為結婚生仔之後有好多嘢要照顧，要放晒心機喺個人仔度，但我仲有好多嘢想做，想繼續拍多啲戲，覺得自己有好多進步空間，目標唔係攞獎，為攞獎拍劇壓力會好大，只希望做到滿意，睇吓觀眾接受我幾耐啦！哈哈！
拍喜劇狂NG
之前套劇有好多搞笑機會，好似菲傭同啤酒妹，好過癮，但喜劇比正戲難演，阮兆祥、江欣燕兩個搞笑大師有好多Gag，我中文唔好，好多時都唔明，人哋笑我唔識笑，到我笑人哋又唔笑，都尷尬(口架)！有場戲祥仔好近距離同我講嘢，唔知點解覺得好好笑，不停咁笑，NG咗10次，哈哈！不過比起以前，我嘅中文已經好咗好多，以前睇劇本係零，全本劇本都唔明，要靠拼音翻譯，依家明一半啦，可以將時間放喺演戲上。以前驚跟唔上好大壓力，依家個心淡定好多，但都有壓力嘅，變咗要諗點樣做好啲。」
後記：5年變師奶仔
初入行時面圓圓的香香，經過多年「修煉」終變成面尖尖、身形纖瘦的Fit爆女神。經過5年由內到外的調理，她已儲落一套美麗法則，更由鬼妹仔變成會到街市買餸煲湯、滋潤進補的「地道師奶仔」！每當有人問起怎樣去水腫、吃甚麼令皮膚有光澤等，她都會侃侃而談，以親身經驗分享一大籮扮靚心得，實行大家一齊靚！
文：影視組
攝：張福宏
髮型：Ivan Lee（Headquarters）
化妝：Zoe Fan
服裝：Caxx Carash