警察摸上門 泳兒屋企漏煤氣
歌手泳兒前晚舉行入行10周年演唱會，獲鍾舒漫、洪卓立、湯怡及吳雨等撐場，向來以慢歌為主的她笑言為免大家瞓着，所以出盡奶力跳舞，更與關淑怡的緋聞男友Milton Lopes大跳辣身舞，一手揸落對方的胸肌！
為中風媽咪打氣
其後泳兒換上性感的紅色低胸裙出場，在Encore環節忍不住淚灑舞台，她感激公司英皇娛樂10年來的栽培，又提到中風的母親仍然留院，未能到場，令她覺得遺憾：「人生好奇怪，如果呢次騷唔係有直播，佢就冇機會睇到我嘅演出。我叫屋企人陪住媽咪，畀個耳塞佢欣賞我嘅演出，呢度好多人同你打氣o架媽咪！」
受訪時，泳兒自爆演出前家中漏煤氣：「應該係舊樓啲喉舊得滯，有警察上門話有煤氣味，差啲要疏散，如果係，我就要帶埋隻狗嚟睇騷，好彩下晝四、五點就搞掂，但我都驚驚哋！」提到與關淑怡的緋聞男友共舞，她說：「我冇問佢，淨係話見到佢嘅緋聞，大家笑啫！」又笑言揸對方的胸肌揸得好開心：「佢叫我大力拍落去，我直情揸落去，因為嗰陣我單腳企，好唔穩陣，一定要搵嘢揸手！」
文：音樂組
攝：張福宏