許冠傑啜足28次 何傲兒索吻食檸檬

一連三場的《許冠傑演唱會2016》前晚假紅館開鑼，雖然Sam年屆68歲，但寶刀未老，以多個造型唱足三小時共五十幾首歌。除了獻Sing外，他又大方向歌迷及嘉賓獻肉嘴，全晚咀足28次！

扭腰趷籮落力伴舞

到貓王金曲環節時，Sam邊唱歌邊行勻四面台派豹紋絲巾，除了為十多位歌迷戴絲巾，又跟他們錫嘴、錫面，男女通殺，「啜啜」聲及尖叫聲不斷！當晚的嘉賓有糖妹、陳凱彤、何傲兒、J.Arie、Sam兩子許懷谷及許懷欣、徒弟林宏龍。Sam跟女嘉賓合唱完都主動錫面珠，唯獨何傲兒冇份！何傲兒身穿露背連身短裙騷長腿上陣，為唱《十個女仔》的Sam伴舞，並主動翹手、拖手搭膊，又做出扭腰、趷籮等舞姿，臨落台前她向Sam張開雙手，似乎想索吻，但Sam看不到只送她落台，沒有跟她錫錫，靚女都冇面畀！

錫Fans	咀糖妹	Sam分別找得糖妹（左）及陳凱彤（右）做嘉賓。

許冠文棟篤放笑彈

之後，許冠文以嘉賓身份上台大放笑彈：「見到我同Sam企埋一齊就會覺得上帝好唔公平，佢咩都叻過我，靚仔過我、身材、跳舞、唱歌都好過我，唯一一樣我最驕傲嘅，就係近年我有兩個孫，以為自己兒孫滿堂好幸福，點知佢拿拿聲就有兩個，跟住11月第三個都嚟緊，咁都贏埋！」他又講到現時香港社會較苦，Sam的歌大可以寫新版，並以《學生哥》為例：「嗰時讀好書搵到好多錢，依家係唔使讀書都搵到好多錢，大學未畢業做議員就搵到四百幾萬一年！」許冠文又指現時社會愈來愈無情，流行曲都不知講甚麼：「近十年全世界20億人都鍾意嘅歌竟然係韓國嘅《Gangnam Style》，都唔知係乜嘢嘅情歌！」又指手機面世後，人與人之間愈來愈無情，大家都只顧撳手機：「成日約食飯都只係講『call你呀』，但呢個世界上只得兩種人係等人call，一種係醫生，一種係做雞。」爆笑全場。譚詠麟（阿倫）以特別嘉賓身份出場，期間他邀Sam合作，最後，Sam以《浪子心聲》為個唱作結。

Sam與阿倫合唱，令人聽出耳油。	許冠文連騎馬舞都跳埋！	何傲兒做晒準備向Sam索吻，點知得個吉。

文：音樂組

攝：鄭家俊