主播黃芳雯向大廚偷師 綁住老公個胃
黃芳雯（Paula）主持飲食節目甚有心得，去年成為人妻的她，在節目中偷師後即回家餵飽老公的五臟六腑，獲老公大讚廚藝了得！識飲識食的她，更在網上設立有關食的專頁，實行要將美食與網友齊齊開心Share！
有線娛樂台主播黃芳雯（Paula）去年成為人妻，向來主持飲食節目的她自言會從中偷師，她說：「我以前好鍾意食日本菜，做節目之後我愈嚟愈鍾意食中國菜，因為平時會訪問啲大廚，原來煮一道好嘅中菜係好花技巧。（乘機偷師？）有呀，我最開心就係因為做呢個節目可以跟埋入廚房睇佢哋煮嘢食。所以知道好多技巧上嘅嘢，啲大廚好nice，會畀好多tips我。」學有所成的Paula，指老公會充當食評家給予意見，令她有進步空間，她說：「通常我會返屋企應用吓。（老公大讚？）梗係有啦，但係又唔準嘅，佢有時都會好中肯，會話畀我聽煮得鹹咗啲或者淡咗啲噃，但我知煮嘢食一定要練習多啲嘅。」
開Page介紹美食
雖然Paula主持飲食節目，不過卻得天獨厚食極都唔肥，全因運動及控制飲食：「依家開始晚上八、九點後食少啲嘢，盡量一星期跳三次鄭多燕。」而她又開設個人飲食專頁，專門分享有關食的東西：「除咗會介紹平時漏網之魚嘅嘢食，亦會分享去旅行食嘢同所見所聞、外國飲食習慣，又或者人妻小知識，總之係關於食的話，就會寫落去，有片有相，so far反應好好，好多女仔鍾意睇！」
每日煲靚湯
成為人妻的Paula雖然與老公因工作關係少見面，但仍堅持每日煲湯滋潤老公：「都少見o架，煮飯我就真係少咗嘅，但我依家講求食物嘅溫度，我堅持每日煲湯，所有中式嘅湯我都識煲，因為要滋潤番我個男人！」
文：專案組
攝：張福宏
場地：御前上茶
服裝：M Missoni