戴蘊慧速成機師揸飛機玩命
「美魔女」戴蘊慧（真真）為慶祝本月27日48歲生辰，早在月初已展開她的「慶生月」節目，前往關島大玩衝上雲霄，做30分鐘Captain Woman後竟飛上癮，本想回港繼續學揸飛機，奈何「超齡」搞到機師夢碎。
已故歌唱名師戴思聰的長女戴蘊慧（真真），雖已是兩子之母兼做埋嫲嫲，但多年來駐顏有術被封「凍齡魔女」，快將48歲的真真仍未見歲月痕迹，全因懂得享受人生。十月是其「慶生月」，真真月初在大仔Bryan及其女友Judie陪同下飛到關島度假慶生，更大膽試揸飛機，真真說：「去到第二日就去學揸飛機，係即學即揸，都幾驚o架！（咁容易？）因為機上面有兩個方向盤，最難嘅起飛同降落都係機師做，當飛到空中就由我轉左轉右囉！不過機師都特登玩俯衝，嚇得我！刺激過坐過山車。」
超齡冇得學
真真稱大概飛了半小時，之後會有一張證書作留念，全程費用約260美元（約2,000港元），她直言這次「衝上雲霄」感覺太正，她和兒子在旅程結束前更Encore飛多轉。問到是否想做Captain Woman？真真說：「我知香港有機師課程，可惜我已經冇咗資格，因為唔收45歲以上嘅人！」
而真真此行除揸飛機，更玩盡海陸空，試玩高空吊索外，又到射擊場當「神槍手」，更出海潛水，她說：「仲畀我哋遇到海龜，個導遊話我哋好好運，因為唔係咁易見到，係當地受保護動物，叫我哋唔好摸佢，但反而係隻海龜全程跟住我，好開心！」真真稱正日生日亦在外地，待回港才和朋友食飯慶祝。
文：音樂組