張智霖顧住班細：唔好畀晒我！
「男神」張智霖剛與舊唱片公司結束關係，正式宣布全面加盟老闆蕭定一旗下新成立的「hmv MUSIC」，給老闆「全包」做「一哥」，他即發揮一哥本色，為了照顧一眾師弟妹，叫老闆不要把資源全給他；而雨僑很開心不用再寄人籬下，可以名正言順成為公司的「親生女」。
張智霖（Chilam）昨日以大師兄身份，率領一眾師弟妹出席老闆蕭定一投資「hmv數碼中國」的新唱片公司「hmv MUSIC」成立派對，旗下歌手包括鄭融、雨僑、少女標本、樂印姊妹、陳詩慧、陳永馨、何浩文、譚芷昀，而連詩雅專程來撐場，Chilam更為公司諗了一句口號：「hmv MUSIC in the loop」，眾人手執唱K神器齊聲高叫這口號。
廿四小時陪阿仔
除了經理人約，Chilam連唱片約也簽給蕭定一，他說：「唱片市場唔易做，咁嘅環境都有人投資，自己有份參與都好開心，我同Neway啱啱出完唱片，大家喺愉快環境下完結關係，好感激佢哋。（今次有冇加盟費？）唔講呢啲，最緊要做好唱片，我交晒畀阿一，對佢百分百信任。（公司有冇承諾投資幾多喺你身上？）冇問呢啲，自己唔睇重呢啲，希望公司咁多兄弟姊妹，比重平均啲，唔好擺晒落我身上。」明年先出新專輯，演唱會最快都要後年。
講到颱風「海馬」襲港，明日要飛上海工作的Chilam說：「聽日（即今日）成家會迎接颱風，希望打完風雨過天青。」他坦言囝囝最開心，因為已收到學校電郵通知，今日不用返學，他說：「我又可以廿四小時陪住佢，我都好耐冇陪佢。」
雨姐個名唔好聽
雨僑好開心公司成立唱片部，她笑說：「終於有番親生女嘅feel，以前好慘好似寄人籬下，公司有自己音樂label。」她否認是公司「一姐」，被叫「姐」感覺好老，她說：「雨字加姐字好醜樣唔好聽。」她希望多做新歌，但就未諗出實體碟，她承認自己也沒買唱片，她笑說：「唔想畀人攞嚟墊煲。」明年公司會為她舉行小型音樂會，但不就不會請男友羅力威做嘉賓，她說：「幾年前人生第一次音樂會已經請咗佢，如果又請佢，驚啲人以為我冇朋友。」
文：音樂組