陳琪爆老公烏龍拎漏被
藝人陳琪上周五開刀誕下小王子Jayden，昨午由老公胡諾言陪同出院，於胡仔懷中的Jayden頭髮濃密，正在睡覺，作為父母的胡仔與陳琪竟出現爭B抱，結果由胡仔勝出，場面惹笑。
復出冇問題
有仔又有女的陳琪一臉滿足兼精神飽滿，獲老公連番送吻。她更透露會餵哺母乳，身體復原情況也不俗，要復出絕對不成問題，但就略嫌有點水腫。對於老公心急見囝囝，陳琪即爆胡仔烏龍事，她謂：「因為出院要用包被包住BB，老公出門口時已經話帶咗，點知嚟到打開個袋係冇嘅！好在姑娘話天氣都唔太凍，可以唔用都得。（兩個女有冇呷醋？）佢哋好開心，我同佢哋講如果第時細佬曳可以打佢pat pat，一個打左一個打右，佢哋仲話一定好好打。」
榮升「胡伯」
談到Jayden的中文名，胡仔表示會交由堪輿學家李居明大師改名，陳琪則指當初對方曾贈言二人命中注定會有兒子，未幾真的成功懷孕，令他們驚喜非常。而正在休息的胡仔，承諾會盡力協助太太照顧兒子，他謂：「屋企已經整好個壇，消毒好奶樽。（見你太太個樣幾精神！）全靠我養到太太肥肥白白。不過今次就貪心少少，兩個女都似媽咪，今次細仔眼、耳、口、鼻都似我，係頸紋似太太，好開心終於榮升『胡伯』。」
文：影視組