麥美恩探天坑未行先腳震

昨日黃德斌、麥美恩（Mayanne）、謝東閔等出席無綫歷奇節目《天與地》記者會，德斌日前與謝東閔、梁彥宗遠赴尼泊爾拍攝，登上喜馬拉雅山馬納斯盧峰。現場播出的節目花絮所見，德斌及東閔於旅程中齊齊捱到病，東閔直認水土不服：「每日都屙得好犀利，推薦便秘嘅朋友可以上高山！」

謝東閔沿途肚屙

德斌受訪時指當時檢查後發現患上感冒，耽誤了行程，提及謝東閔於旅程頻頻肚屙，德斌直認在當地每次如廁都相當掙扎：「個廁所幾日先清一次，我唔想入去。我行去低啲嘅廁所，又好痛苦，因為行兩步就喘一喘氣。（畀謝東閔臭親？）佢會行遠啲。」問到德斌當時身陷險境有否通知女友？他笑稱僅以衞星電話向對方送吻「報平安」：「個衞星電話成日講30秒就斷線。（女友擔心你？）我有打番去，淨係咁『啜啜啜』就算。」

麥美恩要探天坑，先作游繩訓練的她結果驚到腳震。	黃德斌、謝東閔登山後合照。	陳婉衡（左起）、朱智賢及麥美恩將去探險，講起都驚。

送貼士帶大尿兜

問德斌有何建議給即將出發往廣西的麥美恩等人？他搞笑叫對方準備定容量較大的尿兜：「我之前帶個500ml嘅都差啲滿瀉！」Mayanne下星期與朱智賢、陳婉衡出發往廣西天坑探險，為此，事前到獅子山進行游繩訓練，結果驚到腳震兼發爛渣！Mayanne說：「腳震到踩唔穩，轉器材時好忟自己！」屆時要在地洞生活三日兩夜，她說：「到時冇得沖涼，洗手間都喺晒個洞度去，大家都會成身好香！到時仲要素顏，都唔知點算！」

文：影視組