羅嘉良酒後冧言廖碧兒一咀再咀

廖碧兒攬實羅嘉良啜啜鬼咁肉緊，順利咀兩Take搞掂。

以黑警為題材的網劇《無間道》，由再演反派的羅嘉良擔大旗，曾在電影版大受歡迎的「韓森」一角，在監製梁家樹力邀下，由曾志偉再度演出，嘉良稱很感謝志偉的幫忙。兩人日前在停車場拍外景，飾演兄弟的他倆碰面時惺惺相惜，嘉良以影帝稱呼志偉，而志偉亦回敬一句：「你夠係視帝啦！」

雖然劇中演反派，但嘉良與碧兒有感情線，日前兩人便到以青馬大橋作背景的沙灘拍攝求婚戲。嘉良情深款款、講盡冧話向碧兒求婚，被真誠打動的她答應後即攬實嘉良咀嘴！現場有大橋燈光與沙灘上的燈泡襯托，但嘉良為求逼真而自費買來紅酒，即場與碧兒嗒幾杯！如此懂得享受，他笑言只為效果更自然及拍攝順利，果然只拍了兩Take便收貨。

羅嘉良情深說話未曾講完，已成功打動廖碧兒的芳心！	羅嘉良感謝志偉幫手，促成視帝鬥影帝。	志偉前後花八粒鐘染髮重現「韓森」，笑言與梁家樹冇計嘅！

怕有味食定薄荷糖

事後，問到拍親吻戲是否要向老婆申請？嘉良說：「唔使！老婆（蘇岩）都係演員，好明白！（飲紅酒幫助入戲？）大家享受吓過程先，有嗰個感覺就會易入戲。碧兒都好專業，景又好靚，只係有時因潮漲沖亂咗沙灘上嘅燈泡！」雖然曾與嘉良合作，但碧兒面對「視帝」亦不敢怠慢，事前做足準備：「因為我鍾意食啲蒜頭嘅嘢，所以事前都準備好多薄荷糖！呢場求婚戲，嘉良講好多感動我嘅說話，個景又靚，所以咀得好自然。」據嘉良透露，《無》劇將於無綫播出。

文：影視組