祖兒開騷前踩玻璃碎化妝室施「手術」
容祖兒在巡唱前腳底不慎踩玻璃致碎片入肉，臨近演出的她難頂痛楚，惟有在化妝室進行「緊急手術」。一眾工作人員分工合作為她取出玻璃碎片，忍痛力極強的祖兒面不改容，盡顯天后風範。
天后容祖兒與李克勤的巡迴演唱會上周六在惠州站舉行，開騷前發生一段小插曲。事緣祖兒綵排時邊跳邊叫「腳痛」，原來她於家中不慎跌爛玻璃杯，疑她下床時不慎踩中未掃清的玻璃碎片，故腳底的痛楚愈來愈嚴重，一眾工作人員決定將化妝室變成手術室，上演劇集《妙手仁心》的戲碼。
神情輕鬆 識開玩笑
雖然要做「腳底手術」，但祖兒神情輕鬆，更開玩笑說：「（隻腳）臭暈咗20個人。」工作人員分工合作，有人捉實她的腳，有人拿着不同的工具幫忙拔出碎片，最後由祖兒的助手操刀，成功將碎片取出。祖兒說：「我不停話痛，大家可能頂我唔順，突然就好多隻手捉住我隻腳，又眉夾又放大鏡，又針又鉸剪咁，然後一粒鑽石戒指咁閃嘅玻璃碎就出咗嚟，終於舒服晒。」
克勤：熱到底褲都濕
祖兒和克勤首次在室外舉行巡唱，克勤唱完第一部分，已在台上大叫：「究竟天氣熱定你哋熱情嘅熱？熱到我底褲都濕埋。」祖兒即叫他除衫，不過克勤未有理會，即使熱到變「水人」亦未有脫下外套。他笑說：「我唔係走呢啲路線嘛！雖然我都有keep住健身，但我唔係露體狂。」對號入座的祖兒笑說：「你話我呀？我做演唱會都幾暴露o架。」克勤即搞笑邀請祖兒下次一齊除衫：「上次有譚生（譚詠麟）陪我一齊，我咪試過做一次大隻佬囉，有佢喺隔籬傍住，個心定好多。自己一個露就唔好喇，一係下次你又除啦，你除我咪陪你囉。」
文：音樂組