蔡少芬執少千萬貪過癮接棒《老表3》
無綫《老表》系列劇集將於11月開拍第三輯，萬綺雯未能參演，女主角改由好戲之人蔡少芬（Ada）接演！Ada已多年沒有返娘家拍劇，今次由老友王祖藍為她度身訂造角色，難怪賺少幾個月「人仔」、袋少千萬都冇所謂，Ada更賣口乖說：「我係喺TVB紅嘅，返娘家拍劇都好應該。」而自《創世紀》後，十多年後再跟Ada合作的郭晉安亦坦言十分期待。
《老表》系列劇集播出以來收視、口碑俱佳，之前兩輯收視高企，劇中主角、配角出位的演繹令觀眾刮目相看，大獲好評，如蔣志光憑《老表，你好hea！》獲台慶「最佳男配角」、張繼聰憑同劇獲「飛躍進步男藝員」獎項，之後在新劇中更獲派不少要角；而王菀之、陳嘉佳、林盛斌（Bob）等亦於之前兩集中獲激讚。
「想自己開心吓」
此劇將於11月開拍第三輯，女主角萬綺雯因接了兩個舞台劇，撞期不能參演，現時女主角落實由多年沒有返無綫拍劇的蔡少芬（Ada）擔演，其他演員沿用固有班底包括郭晉安（安仔）、王祖藍、陳嘉佳，至於張繼聰及王菀之則會客串演出。Ada自2010年拍罷劇集《飛女正傳》後便沒有再為無綫拍劇，她憑內地劇《甄嬛傳》中王后一角於內地聲名大噪，劇接劇之餘更接了不少內地綜藝及真人騷節目，豬籠入水賺到笑！
Ada今次答應演出，相信與王祖藍有關，因為二人老友鬼鬼，一來他倆未曾合作過拍劇，二來Ada與安仔是老拍檔，早於《創世紀》時已合作，今趟是十多年後再度攜手，他倆都相當期待。Ada接拍《老表3》，最少有三個月不能接內地工作及劇集，必然少賺好多「人仔」！昨日她接受訪問時，被問到為與「老友」祖藍合作而賺少一大筆時，Ada笑說：「拍得TＶＢ劇都預咗唔係喺嗰度搵錢，我都想自己開心吓，之前喺內地拍劇都係配音，咁TＶＢ全部都係現場收音，過癮啲！（套劇旺人氣又旺獎？）其實我做乜都唔會諗住紅先去做，亦冇話諗有獎先去做，只係諗住做一部自己鍾意嘅作品，而且我係喺TＶＢ紅，返娘家拍劇都好應該。」
演搞鬼玩嘢校長
祖藍昨日受訪時坦言，找得Ada拍劇很開心：「佢真係好耐冇返嚟喇！今次除咗因為好朋友之外，我之前講咗個角色畀佢聽，佢聽完都好有興趣，佢今日已經係人妻同人母，個角色都同媽媽有關係，Ada對個班底都好有興趣，個個都好好，佢都相信大家合作會好開心。」說到安仔笑言希望祖藍「撐得住」，祖藍笑說：「好多謝安仔咁關心我身體，依家仲努力緊，我係有參與編劇工作，但都交番畀編劇組，真係太多事情要處理，分身不暇，而且經過一、二輯，佢哋都好熟，絕對冇問題。」
再度參演第三輯的安仔則表示對祖藍劇本有信心，問到之前兩輯口碑、收視好，會否有壓力？他說：「壓力呢啲交畀祖藍，佢壓力大過我，希望佢保重身體，佢又搞電影、又搞劇本，真係分身不暇，好在《老表》不嬲多人，唔會集中晒。其實祖藍都就住晒我哋嚟寫，我對佢嘅劇本有信心，佢都搞咗半年有多。」今次安仔在劇中飾演校長，問是否搞鬼校長？他說：「落得祖藍手，點會冇嘢搞，不過今次啲造型唔會好誇張，而且Ada認真又得，搞笑又得，我哋拍《創世紀》時都合作得好開心，相信今次都一樣。」
此外，Ada昨晚以嘉賓身份出席藝人洪天明、周家蔚、曹永廉等投資美容用品活動，同場有蕭正楠、黃浩然等。Ada承認對做生意有興趣，曾經從商的她發覺做生意不如想像中簡單，令她學識公私要分明。提到她在內地代言的珠寶店網上瘋傳疑派半裸女sell客，其經理人表示經了解後，原來是假店冒認。
文：影視組