Kay驚喜探班挺巨肚賀Bob牛一
現年39歲的歌手謝安琪（Kay）日前宣布有喜兼佗B女，與兒子張瞻湊成「好」字，老公張繼聰近日努力工作賺奶粉錢。阿聰與林盛斌（Bob）等正拍攝葉念琛執導的新戲《失戀日》，前晚Kay挺着巨肚驚喜探班，着連身裙的她貪靚穿3吋鬆高鞋。適逢前日是Bob的37歲生日，Kay與一班演員為壽星仔慶生，合照時阿聰更搭實老婆膊頭放閃。
肥咗要着鬆高鞋
Kay接受電話訪問透露，當日與大學同學聚會後順道探班，更指未有陪老公通頂開工：「我都唔係好夜走，坐咗一陣，大約11點走，我好乖(0架)。（你着鬆高鞋喎！）因為我肥咗，冇咩鞋啱着，同埋着慣高踭鞋，駕馭到鬆高鞋又舒服啲。」Kay更自爆經常探班，爭取時間與老公見面，相當恩愛。
Bob：送祝福畀我
Bob被問收到Kay甚麼生日禮物時，他笑言：「佢梗係有送嘢畀我，送咗個祝福畀我。」已有三女的Bob指會贈送女兒的衣服及玩具給Kay。此外，他透露今個生日過得十分難忘：「日頭陳國峰、梁烈唯同節目《兄弟幫》監製幫我慶生。夜晚拍戲時，葉念琛突然之間攞住蛋糕出嚟，全場仲一齊唱生日歌，真係好驚喜。」
文：專案組