私隱只值幾十蚊？張智霖被出賣行蹤：坐邊班機都知！
張智霖（Chilam）自爆近日被出賣行蹤，更有粉絲得悉其電話號碼後，致電與他聊天，他有感私隱受到威脅，決定出多一個電話號碼作公務之用，並呼籲粉絲不要再到機場等他。
Chilam與前新聞主播蔡雪瑩昨午出席代言護膚產品活動。近日經常飛返內地工作的Chilam，發現有人在微博兜售他的行蹤：「可能幾十蚊一條訊息，就話到畀你聽我坐邊班機，跟住起碼有2、30個粉絲出現。其實有時我行程好趕，但如果唔停低同佢哋寒暄、影相又好似唔係幾好，所以我呼籲大家唔好再嚟機場等我，好似依家咁出席活動咪見到我囉。」
叫外賣洩電話號碼
Chilam指行蹤曝光對自己造成不便：「都覺得有少少侵犯私隱(口架)，以前仲試過被公開回鄉卡添。講真，即使喺香港叫外賣，我都會留自己電話號碼，試過有粉絲打畀我同我傾偈，話佢餐廳啲嘢又平又靚，叫我多啲幫襯。」他表示一向以來只得一個手提電話號碼，所以決定再出多一個號碼作公務之用。
談到網上理財安全問題，Chilam表示：「我只會喺屋企上網，同埋一個星期改一次密碼，改到有時自己都唔記得。」他又稱活動後會飛上海，錄影綜藝節目教演戲：「今次啲參賽者好醒，好多都係演藝學生。」
蔡雪瑩最想食魚生
上月誕下囝囝的蔡雪瑩表示：「依家餵緊半母乳，陪月成日鬧我食嘢食得少。（再生？）順其自然啦，不過我好耐冇食過魚生、壽司，所以想隔一排先。」她又稱囝囝已改英文名Wesley，中文名則未決定。
文：影視組