筱靖撐姊妹聽訴苦減壓

與趙哲妤（Uny）分屬好友的筱靖昨日齊齊出席活動，得知對方自爆懷孕六個月後亦大感意外，但仍力撐好姊妹！筱靖指一個女人單方面出來承認未婚懷孕已不簡單，還聲稱打算一個人湊大BB，讚揚母愛偉大：「其實我都知佢有咗，因為佢同男友分手後都向我訴過苦，之後意外懷孕都有啲不知所措。我冇呢方面經驗，只有做聆聽者，做姊妹一定撐佢！女人生仔已經好唔簡單，仲要係同男友分咗手先知有咗，壓力其實好大！（搵佢男友傾吓點善後？）我唔識佢男友，亦都冇見過，只係聽Uny講佢哋嘅事，所以我只能夠安慰同陪佢，其餘嘅嘢都幫唔到幾多！」