溫碧霞 琦琦送仔女行萬里路

溫碧霞：溫、琦琦：琦

Keep住開心Fun享正能量

溫：為人母親，我哋不如分享吓點樣Keep住狀態啦！我認為心態好重要，要開心！我細個已經開始做Gym，出身汗之後會好精神，又有跑步、踩單車，Yoga就可以幫你Stretch，令到身體線條好靚，Mentally成個人好舒服。

琦：身邊朋友都Keep得好好，我有跟黃佩霞做高溫Yoga，其他運動就係零，相比老公我就真係好慚愧！同埋開心會令個人有好多正能量，依家好多時間係跟個女Schedule，爸爸已經咁忙，我要多啲時間陪佢。佢放暑假，我都似返去學生時代咁一齊放假。做父母畀小朋友嘅禮物係畀佢睇吓呢個世界，否則眼前世界好細。

溫碧霞與琦琦「鬼」咁啱Key，各有不同靈異經歷。	琦琦唔想女兒做井底「娃」，帶她到各地見識。	溫碧霞一有時間就陪個仔，周圍去旅行。

安排夏令營當鍛煉

溫：我冇琦琦咁自由，有時間都盡量同個仔一齊，好鍾意帶佢去旅行，好似去美國、峇里、泰國佢好開心，小朋友呢個時期好短，睇住佢由11個月到依家7歲，係最得意嘅時候。

琦：我多數工作順便去玩埋，今年暑假就用咗七個星期去好多國家。

溫碧霞讚任達華係絕世好老公，琦琦梗係冇Say No！	放大圖片	放大圖片

溫：真係好羨慕。

琦：朋友睇到啲相都好羨慕，送個女去瑞士夏令營，自己之後再同朋友去玩，安排得好好！其實我都好緊張，個女第一次離開我咁耐，好在學校有放相上FB，每晚亦同女傾電話。記得去機場接個女時見佢瘦好多，因為夏令營有好多運動，瘦咗一公斤，但識咗43個新朋友。

溫：我都送個仔去台灣Camp，因為佢中文唔太叻，平時同爸爸慣講英文，去咗兩星期又係都話出年要去！今次冇陪個仔去，但返嚟見佢獨立咗！（為小朋友減產？）暫時唔會！太多滿足感，咁樣反而更加珍惜大家相處，自己啱啱成立電影工作室，見仲有機會係好難得，所以要做得更加好。

共「視」一夫讚任達華細心

Irene與任達華相識多年又合作拍電影，還是同一經理人公司，今次與對方的另一半琦琦詳談，了不免也有提及這位型男，究竟兩位女士眼中的任達華是怎樣的人？

琦：我講會唔會太肉麻？佢好善良同勤力，好多時會企喺人哋角度去諗，我同佢係朋友、閨蜜同靈魂伴侶，大家一齊時好細個，依家都成廿年，一齊長大係最幸福。

溫：華哥係好男人、Perfect Man！對人處事好似你講咁好細心，好Gentle、好吸引人，男人優點應該咁，又錫屋企人，工作時好認真，對自己要求高，所以好欣賞佢。

睇住老公畀狂迷咀

琦：Thank You，畀佢99分！每個人一定有缺點，但佢好少，EQ好高，我急時佢會叫我慢慢嚟，又孝順，對我父母都係，對我身邊朋友又好好。

兩位曾於模特兒界及影壇相當火熱，原來面對熱情粉絲也同樣招架不來。

琦：我覺得鍾意我哋同電影粉絲好唔同，記得有次同老公去內地剪綵，啲粉絲着高踭鞋追住，我同老公講叫司機停車，點知停車開車門後，個粉絲即刻錫我老公面珠，反而我哋（Model）嘅粉絲好斯文，會傾Fashion。

溫：細個拍電視劇，粉絲跟車想跟我返屋企、想知我住邊，我又唔想，有次跟到我驚到揸去警察局先甩到。

琦：我試過同老公去新疆拍廣告，瞓到半夜三更有人嚟敲門，原來係粉絲話好鍾意老公，送哈蜜瓜畀佢！

驚又要講酒店最易撞鬼

琦：依家住酒店多數要求Connecting Room，如果冇就要加床，怕黑嘛！聽過太多鬼古，做Model時等嘅時間長，男仔就講鬼古，我又驚但又想聽，聽得多就驚。

溫：我有呢啲經歷！有次去泰國清邁，瞓瞓吓感覺唔對路，開燈後見窗簾突然打開，即刻打電話畀製片，但同時間有人敲門勁驚，好彩換房就冇事，個心跳得幾勁。

「有人」耳邊吹風

琦：我有次去意大利影雜誌Cover，嗰時新人冇助手跟，但夜晚喺酒店房聽到有啲高踭鞋踩地板嘅聲，諗住開燈瞓，又打畀老公話瞓唔到，佢叫我數綿羊，仲瞓唔到啦！

溫：我上幾個月去北京做嘢，瞓覺有人喺耳邊吹風，之後就有嘢揭開我張被，即刻打畀助手叫佢落嚟同我瞓。

琦：哈哈！原來大家好多方面都好似，今日開始重新認識，以前好多機會見，但少時間一齊咁傾偈，我欣賞你咁多年都咁靚。

溫：我都唔知大家住得咁近，下次約埋同小朋友一齊玩吓！

後記：家有小經理人

攝影師整頓器材之際，旁聽着Irene與琦琦大談歐遊故事，互相推介哪個國家好玩、哪個小島最美麗，聽得小記心癢癢！兩人又分享湊小朋友樂趣，琦琦透露11歲女兒開始大，有次見爸爸正在看西片劇本時，即拿起來細閱一番，又追問他飾演哪個角色，當看罷整個劇本後也認同爸爸適合演該角色，逗得任達華冧笑！琦琦笑言日後老公的劇本可先給女兒過目，儼如小經理人般。

文：影視組

攝：劉斌

場地：Sav Hotel Hong Kong

琦琦化妝：淑貞

溫碧霞髮型：Ken Ng／化妝：Katherine Tsang