歐陽妙芝追夢成功 周汶錡心酸羨慕

名模歐陽妙芝前晚踏台板演出音樂劇，獲名模周汶錡（Kathy）、馬詩慧（Janet）、琦琦與洪華等十多名好姊妹，齊以白色dress code撐場，其他名人嘉賓包括王賢誌、利嘉兒、陳彥行及梁思浩等亦有現身欣賞音樂劇。妙芝對於演出大感興奮，認為機會難得：「我從未試過喺台上又做戲又唱歌，仲有咁多朋友着晒dress code嚟支持，聽到大家講good show同加油都會想喊，覺得好感動。」又開心指細仔方玉亨捧足4場騷，老公及大仔亦會現身今天的尾場。她指近日因回覆好友訊息及準備表演而沒有充足睡眠，大呼完成公演後必要去一趟旅行休息。

為湊仔放棄遊埠

Kathy表示早前有看過妙芝的MV，大讚對方擁有唱歌天分，雖為人母但仍努力追夢。問到Kathy有何夢想未實現？她心酸表示：「我要得閒先去追求，妙芝兩個小朋友大個仔，我啱啱先開始湊仔，夢想要擱置一陣先，等囝囝大個咗先再追。（想追咩夢想？）繼續我嘅遊埠，以前未有小朋友，想去邊第二日就飛，依家要半年或一年後先得，有時間都畀咗小朋友先，做母親真係好偉大。」

妙芝首次演出音樂劇，既緊張又興奮。	洪華（左起）、琦琦、周汶錡、黃佩霞、馬詩慧齊以白色dress code現身撐場。	妙芝的細仔方玉亨全力支持媽咪，捧足4場騷。

馬詩慧自薦客串

而Janet笑言自己的夢想很偉大，希望妙芝及大家的夢想均可實現，又稱從未聽過妙芝唱歌，故非常期待。問到Janet是否愛唱歌？她表示只要揀選適合自己的歌，笑言下次妙芝演出可邀請其客串：「我覺得自己可以，但冇人邀請我咋，同埋舞台劇唔使全部都唱晒，行行企企都要人，我夠高大，有人睇到多啲。」

文：名人組