Aka左膝標血舞照跳
組合Super Girls昨午為晚上舉行的慈善節目綵排，期間隊長Aka慘遭耳機後的鐵鈎𠝹傷「菠蘿蓋」即場爆缸，她冷靜地由姊妹扶到一邊接受消毒，更自爆論盡成日仆，難為左腳「傷，全部都係傷」！
將於11月11日光棍節舉行演唱會的Super Girls（SG），昨晚演出無綫舉行的《善心滿載仁愛堂》節目，昨午她們在無綫綵排表演歌曲《有事發生》時，如歌名一樣有事發生，Aka邊唱邊跳時膝頭突然劇痛，低頭一看發現「菠蘿蓋」血流如注，嚇得身旁姊妹急急扶她落台止血及消毒。
消毒黐膠布
Aka受訪時透露左腳本來已受傷，加上近日密鑼緊鼓排練演唱會，已痛到要接受物理治療，豈料綵排時傷上加傷：「頭先攞住部耳機綵排，跳舞時耳機後面個鈎鎅開啲肉，都幾深，初時只知道好痛，原來已經流緊好多血。」問會否擔心影響演出？她說：「唔擔心，平時跳舞傷咗都係繼續跳，傷口已經噴咗消毒，但仲係咁流血，最後用膠布黐住。」
行路錯重心
SG中午綵排完後，即趕往與歌手王菀之及羅孝勇等出席保良局屋邨籌款活動，期間Aka透露左腳頻頻受傷：「呢隻腳好煩，之前去日本又仆親，成腳瘀晒，頭先綵排又鎅到裂開。」身旁四位姊妹即揶揄：「佢喺無綫留有好多傷痕，要誠心拜神，同埋佢行路好有問題，將重心放錯。」而成員Cheronna透露最近患上腸胃炎，希望大家個唱前都身體健康。
文：音樂組