Amanda S.晒愛：我男友叫Superman！
【陳嘉敏、劉智源米蘭直擊】戀愛中的Amanda S.由男友陪到米蘭睇時裝騷，順便到威尼斯旅行，男友做「跟得男友」兼送驚喜，難怪提起他時，她sweet爆叫男友做Superman！不過，曾經歷過婚姻失敗的Amanda，卻不敢談婚論嫁！
名模Amanda S.與內地女星馬思純於米蘭時間21日出席當地舉行的2017春夏時裝騷，Amanda透露6月在紐約認識了品牌設計師，故今次獲品牌邀請到米蘭看騷。
唔敢問結唔結婚
今次拍拖年多的男友亦陪伴Amanda到米蘭，自從2014年與結婚三年的意大利籍前夫Christian Cappelli離婚後，她的感情事都十分低調，Amanda更直認不敢向男友提結婚：「我之前結過一次婚，所以唔知會唔會再結，但我依家好開心，佢每日都會令我笑，佢好寵愛我，今次我話要嚟米蘭，佢就提議去埋威尼斯，佢成日都畀驚喜我，但我諗我哋唔會結婚，我唔知佢係咪會結婚嘅人，我唔敢問。」
馬思純購物放鬆
此行男友更化身空中飛人陪Amanda先到威尼斯，再到米蘭睇騷，二人去旅行兼處理Amanda在威尼斯的投資，難怪她大讚男友，熱愛旅遊，經常送上驚喜兼相處融洽。問到男友的名字？Amanda不肯透露，笑言：「可以稱呼佢做Amanda's love或Superman。」認真肉麻。
另外，首度欣賞米蘭時裝周的內地女星馬思純表示興奮，完騷會冇上限瘋狂購物，因為買東西是一種放鬆。她透露有份拍由陳可辛監製的電影剛在內地上映，稍後會拍一套古裝電視劇，她希望有機會跟香港演員合作，學廣東話。
文：名人組