陳靜戲鬥三男神：冇畀錢導演換機會

DaDa落力演出林德祿導演的新片《S風暴》，獲安排與張智霖（Chilam）、古天樂及周渝民（仔仔）演對手戲，三大型男吸引力令DaDa為之瘋狂。她稱：「其實仔仔冇外間形容咁cool，只要有合適話題，佢都可以好健談。我中學係睇劇集《流星花園》嘅，亦膽粗粗親口話畀佢聽。今次拍戲有機會坐佢電單車尾，算係意外收穫。」

讚古仔洞察力強

DaDa難忘首天與Chilam開工，即要歇斯底里指着對方狂鬧：「『初哥哥』我真係當正佢係哥哥咁。佢今次扮演一個原本好爛賭嘅警察，搞散咗成頭家，我同佢係兄妹關係，多年冇見再碰面忍唔住要喪鬧佢。拍之前都幾大壓力，驚做唔到要求，好彩幾take之後導演就收貨。」

雖然DaDa與古仔對手戲不多，但她大讚對方洞察力強：「呢方面係我嚴重缺乏嘅。佢本身有獨特嘅魅力，又會將身邊所有嘅工作人員照顧得好妥當，成日萬歲慰勞大家，試過喺現場安排BBQ。」能夠與三大男神合作，DaDa笑稱：「我都有諗過自己前世做咗啲咩好事，但真係冇畀錢導演換機會囉。」

雖然身材驕人，但陳靜希望以演技取悅觀眾，不會為露而露。	陳靜坦言後悔當日一時衝動，宣布退出娛圈。	古天樂（右）與張智霖樂於提攜後輩，令陳靜獲益良多。

不會再退出娛圈

DaDa曾一度揚言退出娛樂圈，結果搞到滿城風雨。問到是否已完全打消這念頭？她爽快點頭回答：「唔會啦，發覺自己真係鍾意演戲，會嚴選劇本、角色，一步一步嚟。依家計劃緊可能出年暑假出國去修讀演戲短期課程。」DaDa不諱言早前參加黃秋生拍檔甄詠蓓的演戲班後獲益良多：「上堂時同學仔會表現出一啲平日唔會流露，或者釋放出嚟嘅情緒，簡直好似變咗第二個人一樣。打個比喻我覺得自己嘅演技係一個盒，但點載都未載滿，所有嘅嘢都需要時間同累積經驗。」

服飾：Asilio

髮型及化妝：Leo Tam@Annie G. Chan

場地：House One Party香港映畫

文：影視組　

攝：攝影組