莊思敏裝修一肚火遭恐嚇「出入小心啲」

向來敢言的女藝人莊思敏（Jacquelin）最近寓所裝修，昨日她在Instagram上載照片大吐苦水，見天花板一角大幅剝落，情況似乎相當嚴重，她留言：「之前漏水叫你上來整又唔覆，依家倒塌咗，點計先，咁嘅裝修工程點算完工呀？仲用啲下三流手段恐嚇我。」

好彩無人受傷

她接受訪問時直言現時家中漏水情況嚴重，懷疑偷工減料所致，而事件已糾纏了約兩星期，令她生活非常不便：「之前裝修師傅應該係偷工減料，令我屋企好多位滲水，相信係因為嚴重漏水，令個假天花負荷唔到冧咗落嚟，好彩當時冇人喺下面，否則就會壓親！」

負責人拒回覆

Jacquelin透露一直有聯絡裝修師傅及工程公司，望對方盡快處理及執漏，但對方不但沒有回覆，更派人留言恐嚇，她直言相當煩惱：「個負責人死都唔聽電話，又唔覆Email，反而仲搵人嚟恐嚇我哋，叫我哋即刻找番條尾數，如果唔係就小心出入咁話！但我哋覺得要完成工程先，佢竟然堅持話唔會整，錢就要照畀，好惡！」問到已繳付多少費用及尚餘多少尾數？Jacquelin表示不便透露，至於會否報警？她稱會交由律師處理。

文：影視組