笑王菀之蜜月忙造人軒仔：一個國家造一個？
歌手王菀之（Ivana）、張敬軒、汪明荃、鄭少秋、吳業坤與衛蘭等，昨日出席《星光熠熠耀保良》記者會，明年合作開騷的Ivana及軒仔興奮表示預售已爆滿，故將宣布加開一場，至於會否再加，則要視乎開售情況。
辣舞挑戰郭富城
昨日所見，剛度蜜月回港的Ivana下巴生滿粒粒，軒仔即大講有味笑話取笑她「食得好嘢多」，Ivana沒好氣說：「濕熱啫！呢排飛得多。（度蜜月？）係呀！其實每個旅行都可以叫度蜜月，今次用咗3個半星期去咗4個國家。」軒仔打蛇隨棍上問她有否趁機造人：「係咪一個國家造一個？」令全場笑爆嘴！問到此行有否甜蜜事發生？Ivana說：「因為好開心可以同張敬軒開Concert，所以喺個Trip度每日同老公都講佢，相信佢唔會呷醋嘅。」軒仔更預告二人屆時會跳辣身舞，笑言以跳得勁過「舞台王者」郭富城為目標！
汪明荃度期撐場
至於剛完成劇目《蝴蝶夫人》演出的汪明荃，慨嘆本地的演出場地很難訂。談及明年是她與鄭少秋入行50周年，二人更分別舉行演唱會，問到會否互做嘉賓？她說：「秋官5月，我就8月中，到時睇吓大家有冇期，盡量配合啦！」此外，談及秦沛前妻梁盛子腦溢血逝世，秋官表示從太太口中得知：「認識嘅，但冇正式合作過，咁後生就走都幾可惜。」
