李亞男見證地下情開花結果
高海寧、李亞男與陳爽等齊為宋熙年（Sarah）擔任姊妹，高Ling直言非常感動，更取笑新郎陳智燊（Jason）：「佢真係好有誠意，畀咗好大封開門利是我哋，即使我哋要求加碼，佢都爽快答應，睇得出好心急娶熙年過門。」她自言由頭喊到落尾：「我衷心祝福呢對新人，佢哋好幸運搵到適合嘅另一半。」
與Sarah相識九年的亞男大讚婚禮氣氛浪漫，更稱見證一對新人相戀七年：「佢選完華姐後我哋一齊住，我睇住佢同Jason開始拍拖、地下情，見證佢哋愛情開花結果。」亞男又稱為Sarah感驕傲：「因為冇咩人幫佢，佢一手包辦秘密婚禮，好叻女！」
一同赴宴的亞男老公王祖藍指婚禮簡單且溫馨，更搞笑為Jason爸爸傳話多謝無綫：「佢話如果唔係兩個人喺無綫認識，一個來自澳洲，另一個來自英國嘅人就冇可能相識。」