十周年騷加開一場Supper Moment齋唱唔除
由獨立樂隊慢慢走入主流樂壇的Supper Moment，今年成軍十周年，他們將於11月7日在會展舉行《溫柔革命》演唱會，昨晨門票公開發售，歌迷反應熱烈，四子在記者會上宣布加開11月8日一場，並於今日公開發售。
回歸「1D」基本步
四子透露「溫柔革命」的名稱由已故老闆Gary所定，並表示對於加場感到喜出望外：「今次會展坐到8千人，係我哋目前開騷用過最大嘅場地，冇諗過半個鐘頭就賣到得番單位。」四子認為現時的演唱會太着重舞台或服裝，他們這次希望回歸基本：「好似黎明開4D演唱會，我哋就開1D演唱會，one direction，淨係向同一個方向去做。」又指會為演出勤做運動，但不會刻意練六舊腹肌。問到若觀眾嗌除衫？他們笑說：「唔會，佢哋叫我哋就偏唔除！」
希望唱勻全世界
他們在活動上拿出歌迷送贈的世界地圖及寫上「濕扒毛聞」的揮春，指會在演出過的地方落記號，希望到不同地方舉行世界巡迴演出。談到十年的兄弟情，他們有感而發：「我哋唔覺自己做得好好，但我哋唯一驕傲係由成立嘅時候冇公司，到簽咗公司、出埋碟都係呢個陣容！」
文：音樂組
攝：黎志輝