馮盈盈自嘲「冇眉娘」
港姐向來美貌與智慧並重，但今屆冠軍馮盈盈似乎對自己的外貌諸多不滿，除了自嘲「冇眉娘」外，更因未能擁有一排整齊靚牙而感遺憾。對於連日來的是是非非，她直言會將壓力化為動力，並澄清已訂婚之說。
馮盈盈昨午偕同亞軍劉穎鏇、季軍陳雅思及友誼小姐張寶兒到銅鑼灣莎莎化妝品領取獎品。談到扮靚之道，馮盈盈竟自揭瘡疤，稱天生眉毛稀疏，打趣自嘲是《冇眉娘續集》女主角的不二之選！
強調未訂婚
受訪時馮盈盈繼續自爆「弱點」：「其實眉毛稀疏都唔係最差，有化妝師反而仲讚過我，話畫條咩眉畀我都得。我最唔滿意係個嘴，牙齒天生唔齊，食嘢經常留啲食物喺牙罅，之前有打算參選後去箍隱形牙套。」當選已一星期，她表示開始懂得將壓力變成動力，並感謝師姐麥明詩私底下傳短訊為她打氣。對於近日網上瘋傳一張疑似曾出現於其社交平台的圖片，內容涉及淫褻語句，她否認出自其手筆：「我冇上載過呢張相，可能係誤會、誤傳，張相好假，真係唔係我。（擔心影響形象？）覺得搞笑多啲，總之清者自清。（驚唔驚繼續被翻舊帳？）我想講有人傳我訂咗婚，但冇啲咁嘅事，社交平台張戴戒指相係兩年前搬屋，媽咪搵番隻古董戒指畀我試戴咋。」
劉穎鏇憂異地戀生變
亞軍劉穎鏇由美國回流返港參選，她直言正為留港發展作出打算：「所有嘢傾緊。我喺美國讀緊大學工商管理一年級，依家諗緊有咩方法折中，可能申請喺香港讀書都唔定，如果返嚟住，爸爸會跟我一齊租屋住，媽咪就留美國。（擔心同男友感情生變？）擔心嘅，不過佢都喺美國讀緊書，冇得叫佢返嚟。」
文：影視組