王宗堯忠告要控制出軌

藝人王宗堯昨日在迪士尼樂園出席「Disney Halloween Time-反轉迪士尼」活動，提到張致恒被拍得背女友莊端兒偷食富貴台妹Doris，事後直認「控制唔到鹹濕」，問到他又能否自控？王宗堯說：「正常男人要鹹濕，但正常人可以控制自己。佢可以鹹濕，但唔可以出軌。」又笑指身邊廣布女友蔡潔的線眼。問到在他眼中，何謂出軌？他說：「要經過一段曖昧關係，甚至做出錫嘅親密行為先算。（搭膊頭唔算？）有時基於Gentleman問題，可能都會扶吓啲女仔！」另外，王宗堯笑言以往會整古造怪慶祝萬聖節，問會否扮鬼整蠱女友？他笑稱女友相當膽小，自己最想扮巫師催眠老闆蕭定一：「想催眠佢畀我快啲開戲，再延期驚撞其他工作！」