張致恒偷食上癮搵醫生

張致恒（Steven）爆偷食事件後，昨晚現身電視城錄影節目《你健康嗎？》，首度公開見傳媒。Steven神情沮喪，問到是否情緒受困？他眼紅紅說：「錯就要認，打就企定！我承認我係做錯咗好多嘢，亦都好對唔住莊端兒，所以……係喇……分（咗）手！」問到「錯事」是否指偷食？他口震震說：「曾經係試過嘅，自己做錯過嘅事，係要自己承擔番個責任。（就係呢次同Doris？）呢個係個別事件，喺好耐之前都試過，好彩佢（莊端兒）夠大量，但今次我都原諒唔到自己，係我提出分手，自己都唔識點講，係好對唔住佢！」

其實同小三唔熟

提到莊端兒在訪問中哭訴對他感失望，決絕斬纜！Steven終於忍不住落淚說：「正常啦……我咁做……正常都唔會有女仔覺得我好。（好後悔？）會，每一次做錯事都後悔，但每一次都有做錯事，只能夠講，希望下次唔會。」問到經常重複犯錯，可有考慮向醫生求助？他說：「我都有啲想，係咁多年好困擾自己嘅問題，希望有一日可以解決到。」

落淚認錯 喺好耐之前都試過，今次我都原諒唔到自己。	鞠躬道歉 Steven雙手合十，並七度道歉。	Steven被拍得背女友偷食Doris，上樓蜜會。

提到「小三」Doris背景富貴，雖然任職售貨員，卻揸名車出入，Steven竟表示彼此「唔係好熟」，只是透過Facebook認識：「我真係唔知，我冇坐過佢架波子，佢亦冇去過我屋企。（你去佢屋企？）係，我承認。（你控制唔到自己見一個愛一個？）唔識講，只識講對唔住，要同莊端兒講對唔住，我浪費咗佢咁多時間。」至於可有想過如何挽救形象？他說：「唔知呀！睇吓醫生囉！睇吓自己係咪有問題囉，係咪沉溺、上癮，唔知……（外國有性上癮案例，懷疑自己有呢個問題？）我真係唔知，我會去睇一睇醫生，做番好自己。（擔心影響前途？）一定受到影響，係擔心影響到其他人，影響到大家嘅話真係要講聲『對唔住』，大家原諒我啦！」

莊端兒狠心斬纜

問到可會與Doris繼續交往？Steven稱現時沒有心情，會先做好自己。他透露事件曝光後，Doris曾傳短訊聯絡，但他沒有回覆，只想事件盡快告一段落。記者表示與Doris斬纜，或可令事件盡快結束？他說：「唔關佢事，最主要係自己問題。（覺得對Doris唔住，同佢發生關係，但依家又唔理人？）總之點都好，都係我錯，我淨係想快啲解決件事，對唔住，對唔住……」受訪後即雙手合十以表歉意。

記者昨日聯絡到莊端兒，對於Steven再次傷害她，她在電話中不禁痛哭，說：「有聯絡過。（對佢好失望？）真係好失望，我可以好肯定答你，今次冇機會翻撻，真係斬纜！（之前仲影到你哋恩愛行街？）你哋話咩就咩啦，我對佢新女友亦冇睇法，因為我冇睇，唔想睇！」

文：影視組、音樂組