Chilam獻「第一次」古天樂：唔通HeHe?

古天樂、張智霖、蔡少芬（Ada）、林保怡、陳靜及監製黃百鳴等，前晚到旺角出席新片《S風暴》首映禮，剛做老竇的周渝民缺席，但仍拍片分享拍攝點滴，大會又為本月17日43歲生日的Ada送上壽包預祝。

古仔與Chilam曾在劇集中爭女，今次在戲中又關係敵對，問到現實中關係如何，古仔打趣說：「你想我點答？唔通係HeHe？」Chilam大爆二十多年前曾跟古仔「煲蠟」，他說：「我突然醒起有年中秋，我、靚靚（太太袁詠儀）同古仔煲蠟，係我第一次煲蠟。當年我哋冇咁忙，多啲聚會，依家冇機會再玩，依家煲蠟都唔合法。」

黃百鳴（左起）、林保怡、Chilam與古仔（右二），為蔡少芬預祝生日。	蔡少芬拎燈籠應吓節。	陳靜拎燈籠應吓節。

拒做演唱會嘉賓

問會否相約古仔為Ada慶祝生日兼賀中秋，他說：「我要去上海開工，Ada有可愛老公同活潑囡囡，我哋無謂做電燈膽！反而我想搵古仔合唱，下次演唱會我一定要搵佢做嘉賓！」怎料古仔即時拒絕：「唔好喇啩！我同古巨基錄《當年情》已經係破天荒，我好耐冇錄歌，好生疏，但哥哥（張國榮）當年提攜過我同基仔、鄧一君，咁啱基仔提議合唱呢隻歌紀念哥哥，成個過程都順利。」他又自爆中秋做宅男：「難得有假期可以喺屋企陪屋企人。（媽咪冇催你帶另一半返屋企？）冇喎！屋企通常得我同阿爸，阿媽好忙、好多活動！」

Ada冇諗追多個

至於Ada被問到老公張晉會否為她炮製生日驚喜，她說：「佢唔係浪漫嘅人，有想要嘅我會開聲，今年講咗喇，睇吓有冇。（想生多個？）冇諗過，唔會搵自己嚟搞！」提到陳法蓉（Monica）被同屆港姐梁佩瑚指當年參選講大話，Ada說：「重提幾十年前嘅嘢冇所謂，但唔好傷害人。（求證真相？）唔會，過咗去，我同梁佩瑚識但唔熟，我只想表達我好錫Monica。」

文：影視組