李佳芯洗狐名甘被踩死蠢
擅演「邪花」的李佳芯（Ali）在新劇中飾演耿直少女，慘被同劇的前輩廖啟智叫「死蠢」！不過Ali笑言不介意，更希望今次角色能成功跑出為她「洗底」，搣甩「狐狸精」封號。
藝員李佳芯（Ali）、廖啟智（智叔）、李璧琦、張曦雯及黃智雯等，昨日現身將軍澳宣傳新劇《律政強人》，一眾演員在台上介紹角色，李佳芯在劇中個性耿直，在台上慘被智叔叫「死蠢」！而同為男主角的方中信因在內地工作未有到場，劇組特別準備他的人形紙板，Ali笑言要請他飲紅酒，智叔則抬起人形紙牌扮彈結他，相當搞笑！
與黃智雯Sell姊妹情
Ali接受訪問時，講到智叔在台上叫她「死蠢」，她笑言不會介意，因劇中角色個性黑白分明。問到在劇中是否同樣被智叔叫死蠢？Ali說：「喺劇度經常畀佢鬧，仲怒睥我，拍劇初時都唔敢同佢傾偈，後來耐咗發現佢好玩得，未Roll機嗰時好似小朋友！」被指擅演「邪花」的Ali，坦言今次角色反差極大，希望新劇可助她「洗底」！問到有否感情線？她說：「有姊妹情，同張曦雯、黃智雯，後尾都有仰慕方Sir（方中信）。（有親熱戲？）咁又冇。（想搣甩狐狸精封號？）都想o架！話晒跟咗我咁多年，想大家睇到一個死蠢嘅Ali。」
李璧琦被「老公」打
智叔指在劇中有不少嘈交戲，而「動作戲」則是怒打老婆李璧琦：「有時都要對方硬食一嘢！（打到紅晒？）要問番佢啦！（摑佢？）叉頸嗰啲囉，唔通倒吊咩？（覺得內疚？）唔會，大家投入角色。」而李璧琦講到被智叔「家暴」，她說：「係呀，兩個人都要分開，今次角色好唔同，之前多做正直啲，好似警察咁，今次會多啲心計，有啲激動場口都幾令人心寒。（係咪紅杏出牆所以被打？）唔係！智叔佢都唔係好人！（堅係摑？）係呀！兩、三巴，預咗硬食，智叔會提我『嚟o架喇！』我都會叫佢快啲，速戰速決！」
文：影視組