婷婷頂得住冇畀偉仔電親
藝人謝婷婷一向追求者眾，最近與「電眼王」梁朝偉合作拍戲，未有被對方電暈，但大讚偉仔令她易入戲，更經常到片場偷師。而偉仔恩師王家衛最近獲著名外國網站票選為「華人導演之冠」。
婷婷昨午出席英國品牌活動，剛於9月7日踏入34歲的她表示，生日當天於工作中度過，父母謝賢及狄波拉玩驚喜，失驚無神探班，令她感動非常。最近與梁朝偉合作拍攝馬楚成執導新片《歐洲攻略》的她，透露稍後要往意大利拍外景兩個月，更化身打女，有連場動作戲。
記者問婷婷有否被偉仔電親？她笑說：「有場戲佢要突然哄到好埋，如果平時我一定笑咗，但畀佢影響好易入戲。（偷師？）有呀，好多時未到我開工，我都會早啲到片場睇佢拍戲偷師。」問婷婷生日願望是否快點覓得真命天子？她稱：「其實我唔心急，都冇諗過要幾多歲結婚。」談到哥哥謝霆鋒女友王菲復出開演唱會，婷婷坦言想成為台下觀眾，更反問記者對方會否來港開騷：「雖然我中文唔好，但我以前都有睇過佢嘅演唱會，一路有聽佢歌。除咗佢之外，我都欣賞張學友。」
王家衛膺華人導演No.1
另外，偉仔恩師王家衛執導的《花樣年華》，早前獲BBC英國廣播公司票選成為「21世紀最佳100部電影」的第2位，近日他再下一城，獲外國著名網站TSPDT舉行票選，擊敗張藝謀及李安等強敵，成為「影史TOP 250導演華人導演部分」的No.1，其執導作品《重慶森林》及《阿飛正傳》等更躋身「影史最佳1000部榜單作品」前茅。
文：影視組