學友重踏四面台 星爺瞓街撲飛
歌神張學友昨日為12月4日開始、共20場在紅館舉行的《A Classic Tour學友‧經典世界巡迴演唱會》舉行記者會，學友大呼唱20場有壓力，不惜閉門苦練Rundown逾百次！大會為搞氣氛，更播放周星馳昔日「瞓街排隊」撲飛的片段搞笑！
學友闊別紅館5年，大會豪花百萬元開記者會，筵開17席，更特別設計紅館造型的升降台給讓他站台，氣勢十足！學友表示自1995年起，已21年未開過四面台，他笑言個唱星級團隊年齡加埋有幾百歲，但會努力為大家製造驚喜。
「細佬」張家輝爭睇排舞
學友自公布開騷後即掀起搶飛潮，大會昨日別具心思播放當年學友客串周星馳電影《破壞之王》中的經典一幕，講述周星馳瞓街排隊去撲學友演唱會飛，但依然一票難求，學友看畢後笑說：「係1993年，事隔23年，你哋仲夠膽拎出嚟，但好欣慰，多謝大家呢幾十年嘅支持！」
至於可會在演唱會上騷六舊腹肌？他笑說：「我唔會啦！我冇諗住挑戰後生仔嘅身形。（可會叫『細佬』張家輝任嘉賓？）佢係想，但我唔容許囉，不過佢都有嚟睇我排舞。」又透露太太羅美薇和兩個女兒對他唱歌跳舞不太感興趣：「冇乜呢個癮，有嚟睇我排舞，但睇睇吓都走咗，不過我意志力好堅強，只要有一個仲喺度睇，我都會跳。」
閉關苦練逾百次
提到20場演唱會由12月4日唱到29日，當中有6日空檔，學友說：「每隔3場會休息一日，希望有足夠嘅休息，確保20場順利完成。」並坦言20場有恐懼和壓力：「準備咗好耐，做晒Rundown同背晒歌詞，喺屋企練咗超過100次。」問到是否一身飛債？他說：「我來者不拒，接咗幾多就話畀公司知，希望盡力靠我把口落飛會好啲啦！」
文：音樂組
攝：李柏儒