Clara露背搶Fo盼花都浪漫
【林惠珊澳門直擊】韓國女星李成敏（Clara）、歌手莫文蔚與來自世界各地的歌手、舞台劇演員等昨日出席澳門巴黎人酒店的盛大開幕禮儀式，Clara與莫文蔚一個性感、一個高貴！有「全球第二美女」之稱的Clara呻工作太忙苦無拍拖機會，望有朝一日拖另一半浪漫遊巴黎。
金沙中國有限公司與母公司拉斯維加斯金沙集團旗下最新的澳門巴黎人綜合度假村「澳門巴黎人酒店」昨日隆重開幕，歌手莫文蔚（Karen）、比利時騷靈歌手Lara Fabian、韓國女星李成敏（Clara）、法國女星Rafaelle Cohen、舞台劇男星Samuel Edwards、音樂劇《Thriller Live》演員、王梓軒、肚大如籮的李樂詩（Joyce）、車婉婉、龔慈恩與陳百祥等現身紅地氈，星光熠熠！Clara以金色露背晚裝上陣，打扮性感，期間還大送飛吻，Karen則以黑白長裙配上名貴鑽飾登場，夠晒貴氣。
李樂詩隨時牛一生仔
Clara與梓軒一同受訪，兩人透露早前在《亞洲電影大獎》碰面，梓軒透露稍後想跟Clara有音樂上的合作。問到對方可是自己「杯茶」？Clara怕醜讚梓軒很友善，梓軒則讚Clara獨立及聰明。Clara又透露從未到過巴黎，希望將來可以跟男友去花都浪漫，但現時太忙而冇時間識男友。至於佗B八個月的Joyce透露今胎是第三個仔，問到兒子們會不會怕很百厭？她笑說：「佢哋好乖！曳我都唔敢生！（預產期幾時？）十月尾，會順產，其實到時都係我生日。（想同一日？）冇乜所謂！」
莫文蔚歐遊慶結婚五周年
Karen身上佩戴閃亮鑽石，配白黑長裙顯得亮麗大方，她表示獲邀出席開幕禮感開心：「睇住呢間酒店一直起緊，個鐵塔又一直升緊，所以今日可以嚟開張好榮幸。」倫敦讀書的她透露曾到巴黎，跟老公度蜜月時亦有到訪花都，問到可有甚麼浪漫經歷？她甜笑說：「同老公去邊都好浪漫。」稍後將到歐洲跟老公慶祝結婚五周年。講到曾揚言每逢紀念日都獲老公送戒指，今年是否又有得收？Karen笑說：「唔知喎！每年佢會送戒指仔畀我，但唔係我叫佢咁做。（愈嚟愈大粒？）其實係心意，年年都唔同款式。（送番畀佢？）冇呀！我要戴滿成手。」講到戴上名貴鑽飾，她笑言不敢問價錢：「總之好靚。（戴起嚟特別有壓力？）唔會！但真係覺得自己靚啲。」
