麥美恩森美爆肚寸出火：我同佢撈亂骨頭！

曾經合作無綫節目《學是學非》的無綫藝人麥美恩和森美老友鬼鬼，愛鬥嘴的二人前晚在《2016香港小姐競選》中因鬥嘴而擦出火花。美恩一句：「學嘢啦！森美！」換來森狠狠還擊：「好似麥美恩呢啲咁就完全唔得，嚟緊50年台慶都唔想見到佢。」事件經《東網》報道後，引起網民極大回響，有1.1萬網民畀Like，並惹來網民「洗版」，當中有網民指美恩冇大冇細，有些則指二人有火花，並提議下屆二人做司儀再擦「火」花，令這對鬥氣孖寶人氣升溫！

被叫適可而止唔好再玩

美恩昨日接受訪問時稱有留意網民的留言：「我同森美成日喺節目都有碰頭，好明顯我同佢係撈亂骨頭，不過我哋係互相尊重嘅，佢喺我哋心目中係大哥哥，佢亦知我性格，都知我唔會亂辣火頭。」她又坦言前晚二人在節目中鬥嘴是沒有夾過，亦沒有稿跟，出來效果確實不俗。說到網民提議二人做司儀，她說：「無任歡迎呀！森美平時都有提我適可而止，不過我都收放自如。（佢都去得好盡，會唔會嬲？）No No No！佢都幾好笑，都算成功。我哋玩完之後，森美都有話唔好再玩，驚搶咗成個Show。」有指美恩在螢光幕前大癲大肺，形象如吳君如般，她笑說：「都有人講過，係嘅話我好榮幸，都好開心大家對我有印象，不過其實我都有斯文嘅一面。」

窒「梗頸四」唔靚輸梗

而森美接受電話訪問時表示跟美恩只是開玩笑，他說：「我哋冇夾過，係佢爆肚先，我聽到佢嗰句：『學嘢啦！森美！』我都呆一呆，好在我仲有機會窒番佢，我份稿本來係講『要口齒伶俐』，但我就改咗『唔好牙尖嘴利囉』。（大家有冇真嬲？）冇！我哋之後坐埋一齊仲不停傾偈，我仲問佢當年選港姐做『梗頸四』有乜感受？佢話好苦（口架）！我就話佢咁唔靚，輸梗啦！」對於美恩叫他向港男學習，森美說：「我都會學習，雖然男人睇男人唔會睇入眼，但我睇到啲港男好有肌肉，我都想學吓。」有網民提議兩人一齊做下屆港姐司儀，森美覺得是好提議，當年美恩選港姐也是由他做司儀，他說：「想做星級評判多啲，不過如果網民鍾意，我都可以同麥美恩試吓嘅。」

文：影視組