克勤失魂落魄祖兒擺陣安撫
天后容祖兒及李克勤前晚舉行巡唱的東莞站，卻撞正曼聯對曼城的英超曼市打吡戰，祖兒看到身為曼聯迷的克勤坐立不安，知道好拍檔心繫球賽，即貼心吩咐工作人員搵齊設備，讓克勤開騷前可在後台睇波！
容祖兒及李克勤的世界巡迴演唱會前晚到東莞站，剛好是英超曼市打吡戰，由曼聯主場對曼城，身為曼聯球迷的克勤在演出前一直心掛掛，窩心的祖兒即發動一班工作人員為他準備wifi及看比賽的設備，她笑說：「我見佢開騷前喺後台突然好似腎上腺素急升咁，坐立不安，手心冒汗，眼神又飄，冇咗神，我覺得要雪中送炭，等佢睇到少少可以心息，安定番佢心神再去做騷！」
追問觀眾賽果
克勤透露老婆盧淑儀有不停傳訊息報告戰況：「冇諗到曼聯一開波冇耐就輸一比零，我個心即刻亂咗兩秒啫，咁都畀祖兒留意到。當我聽到二比零，我已經好沮喪，但好感動佢竟然搵齊設備送畀我睇波，曼聯喺我開騷前入番一球，二比一，我就收拾心情上台。」
演唱會上，克勤首唱新歌《一個不能少》後，即問觀眾現時球賽的比數，更笑稱：「如果曼聯贏咗就唱到12點。」雖然曼聯最終沒勝出，但因觀眾反應熱烈，兩人唱到11點40分才願落台。
陪寶貝仔過節
由去年9月11日於香港站開唱，至前晚剛好度過一周年，這一年祖兒和克勤已做了二十多場巡唱，接下來還有深圳、上海、惠州及湛江站等，只見祖兒明顯消瘦不少，着tube dress時更瘦到離晒罩！為紀念他們巡迴一周年，加上中秋將至，大會特意送上巨型大燒豬作拜神之用，又準備東莞月餅及燈籠讓他們提早過節，克勤的好友亦送來鮑魚為他們慶祝。
問到兩人今年中秋會如何過？祖兒表示將與Twins等英皇歌手組團去派月餅，她的慈善基金會亦會再派，希望可以帶溫暖給有需要的人，又指想將最新養的小狗接回家過節。而克勤這位二十四孝父親早已為兩個兒子準備好燈籠，他說：「我一早買定最hit嘅比卡超燈籠畀細老闆（細仔），大老闆（大仔）就揀咗個星戰燈籠。」
文：音樂組