鍾麗淇讚大女進「步」神速
前藝人兼瑜伽導師鍾麗淇（Margaret）的長女患有先天性疾病，昨日Margaret出席活動時開心地表示不良於行的女兒，現時毋須兩手拖實，只需一隻手攙扶便能走路，她說：「囡囡真係無敵，其實大家唔使用可憐嘅心態對待特殊兒童，佢哋比一般人更堅強。」
鍾麗淇、名模周汶錡（Kathy）、趙嘉懿與兒子、名媛曾昭怡、「美心妹妹」楊鎧凝、鼓手Tom與太太何思諺等昨日現身慈善活動。Margaret談到現年五歲多、患有先天性疾病「4號染色體缺損綜合症」的大女Isabella現時行得不錯：「老師話佢進步得好快，依家唔使拖住兩隻手，拖住一隻手都可以行路，好多人都未見過我嘅大女，本來今日我想帶佢嚟同大家見面，因為日子問題要取消。（佢會唔會怕人多？）之前帶過佢去主題樂園，嗰度都好多人，佢都唔驚，但有閃光燈就唔知佢會唔會驚。」
要過好多關
見證女兒克服困難，逐漸進步，Margaret對女兒Isabella引以為傲，大讚無敵！她希望大家能讓特殊兒童發光發熱：「我有教特殊小朋友做瑜伽，希望大家畀機會佢哋發展，啲人見到佢哋覺得佢哋好慘，第一時間係覺得可憐，但唔應該可憐，可能佢哋堅強過你、叻過你！佢哋有阻礙，要過好多關，所以我好佩服啲小朋友同家長。」
周汶錡追女
同場的Kathy表示兒子剛剛十四個月大，問到將來會否母子檔行catwalk？她說：「男仔行catwalk唔係咁好，留畀女仔。（追個女？）希望承你貴言，我都想生，因為可以有個伴，冇咁悶，不過有得生先算。（不設防？）加油努力，老公好鍾意小朋友，法國人鍾意生三、四個，我生到再講。不過對我嚟講，懷孕過程都幾輕鬆，我都想生多個。」
文：名人組