陳慧琳摩打手畫2000隻龜

天后陳慧琳（Kelly）昨日於觀塘apm舉行「apm x 陳慧琳let's celebrate！世界巡迴演唱會2015 DVD簽唱會」，吸引超過五百歌迷及途人圍觀，場面墟冚！大會指Kelly為滿足粉絲，將會為二千名粉絲簽名，恐怕她要出動摩打手！Kelly笑言全日都會在apm簽名：「演唱會DVD賣得好，加印咗三次，遲吓會推出blu-ray碟。」她的兩個兒子「蝦餃仔」及「小龍包」已開學，Kelly忙於督促他們溫習做功課，問到可有叫囝囝同學的家長幫襯買DVD？她即說：「哎吔！尋日係家長會，蠢咗添！（喺學校搞簽名會？）嘩！會嚇死佢哋，即刻趕我出校呀！」

用歌名送上祝福

本月13日是Kelly的生日，有歌迷特意準備了蛋糕為她預祝，暫時Kelly未諗如何慶祝，她說：「老公唔使送都係禮物啦，已經好大負擔，錄個video剪輯嚟送畀我都好，有啲心思。」提到她早前為歌神許冠傑拍片，令其豪宅曝光，Kelly笑言：「唔係好豪，係好亂，亂宅一個！」

Kelly嚟喇！同Fans say hi先！

Fans送蛋糕預祝Kelly生日，食啖先！

馮德倫、舒淇昨日公布婚訊，Kelly曾與馮德倫合作，大讚二人匹配：「恭喜佢終於抱得美人歸，唔再『Dry』！同埋快啲生BB，一定好得意，要搵學校我可以幫手。」又笑謂會送演唱會DVD作賀禮，並將自己的歌曲串成祝福：「祝佢哋『有福氣』，『let's celebrate』呢個『大日子』！」

文：音樂組　

攝：張福宏