劉穎鏇馮盈盈贏雙冠軍單文柔緊張到濕晒
十位《2016香港小姐競選》候選佳麗出席活動時落力拉票，由現場觀眾票選「現場最受歡迎佳麗」，最後竟爆出雙冠軍，由(2)劉穎鏇和(6)馮盈盈率先跑出！嘉賓鄭俊弘起初熱捧(2)劉穎鏇，見過佳麗真身後卻轉軚支持(3)張寶兒及(7)陳雅思，至於(10)單文柔則緊張到出晒汗。
《2016香港小姐競選》10位候選佳麗前晚到將軍澳出席「TVB fun全城熱選」拉票活動，由現場觀眾投票選出「現場最受歡迎佳麗」，結果爆出雙冠軍，由(2)劉穎鏇（Tiffany）及(6)馮盈盈（Crystal）同時贏得獎項。
Tiffany坦言沒想過可以獲勝，又表示在觀眾面前自我介紹，心情非常緊張：「喺屋企練習咗好多次，得到觀眾支持，對決賽都增加唔少信心！」Crystal同樣高興，並表示獲觀眾肯定，對決賽更有信心，問到可有邀請朋友到現場投票？她說：「參選後有一、兩個Fans，有個小妹妹都嚟咗現場，咁啱我又抽到佢，仲頒埋獎畀佢！」
後台吹水減壓
一眾佳麗出場向觀眾拉票時，(10)單文柔（Phoebe）被發現腋下濕了一撻，她受訪時說：「可能係緊張，下次會注意吓，決賽唔會咁失禮。（點減壓？）臨近決賽，緊張一定有，頭先喺後台出場前都會同其他佳麗玩同傾偈，出到嚟會冇咁緊張！」
鄭俊弘中途轉軚
另外，嘉賓鄭俊弘是首次見候選佳麗，他表示未見佳麗前，心水是Tiffany和(5)蘇韻姿，但見過佳麗出場現真身及談吐後，卻轉軚讚(3)張寶兒及(7)陳雅思，大讚兩人談吐得體，Tiffany對此表現大方，笑說：「唔會唔開心，每個人有自己鍾意同唔鍾意，我覺得佢都好靚仔。」
文：影視組