鄧愛嘉自立門戶搞攝影
鄧永鏘女兒鄧愛嘉、恒基地產主席李兆基外孫女李敬儀擁有顯赫家族背景，卻沒有因而想順理成章繼承家族生意，熱愛攝影的鄧愛嘉不靠父蔭，與丈夫開設攝影工作室，自立門戶；而李敬儀雖在恒地工作，但亦不忘四出搜羅其時裝興趣。
名媛李敬儀（Vickie）、鄧愛嘉（Victoria）、富商曾文能女兒曾昭亮等，前晚出席「Max Mara 101801 De-Coated」展覽。以攝影師身份出席的鄧愛嘉，為展覽親自操刀請來謝婷婷拍攝一輯既性感又高貴的影片，媽媽張淑儀（Susanna）還專程來捧場。
鄧愛嘉透露現時與老公分工合作，開設攝影創意工作室，故未有時間造人。問到爸爸有否投資其中？她直言：「冇，但佢有幫襯，公還公，私還私，以前跟佢做四年，無意中都學到佢，做好一件事先，唔好花心。」自立門戶、不靠父蔭的她，坦言零售好難做，用自己四年經驗去嘗試與各品牌合作。而Susanna被問到會否恨抱孫？她風趣表示：「想，佢（鄧愛嘉）叫我到時幫手教，我就話唔好搞我，得閒幫手湊就得，孫係要寵，但唔會刻意催佢，依家女性有事業家庭，仲有老公。」
李敬儀公私分明
而一向鍾情時裝的李敬儀透露現時在恒地工作，但亦不忘為興趣努力，與家姐李敬恩及妹妹李瀅三姊妹開創時裝網誌，分享穿衣之道及生活點滴，她說：「自己鍾意時裝，所以會出席鍾意event，有時三姊妹都一齊去，但係會focus番公職、做business，時裝只係興趣。」
至於曾昭亮則忙湊七個月大的兒子，更透露想追多個：「但好忙，我啱啱先有時間去event，等囝囝大先，想要女，順其自然。」提到現時身形fit爆，她笑言皆因去旅行時要自己湊B，冇帶工人，所以食少了。
文：名人組