欣宜曾想放棄唱歌拒做低頭族

歌手鄭欣宜（Joyce）最近推出同名專輯《JOYCE》，出道以來飽受劣評的她坦言簽現時唱片公司及經理人公司前，曾有段時間想放棄唱歌：「覺得唔適合做呢行，甚至已經搵咗工，係完全唔再同娛樂圈有關係。當時覺得自己好似望唔到前路，卡住咗半紅不黑嘅位置，好用力做好多嘢但又冇人留意，唔知唱嚟為乜！」然而，家人和朋友的說話令她重拾信心：「佢哋話：『無論你作出咩決定都會支持，但係如果你唔繼續唱歌就會好嘥。』咁簡單嘅說話對我嚟講已經係好大嘅鼓勵。冇耐我就認識咗蕭定一同星娛樂，跟住就決定再試吓。」

不敢與人眼神接觸

擁有第二次機會的Joyce決定要做到最好：「我同自己許下承諾，如果我再出歌，每一首出到嚟都一定要係我好鍾意先得。機會唔係必然，所以我好努力爭取每個機會。我成日有個想像，就係我啲同事每次收到我嘅message或來電，都係『嘩，又係佢。』喺樂壇嚟講，我29歲其實唔細，所以我唔怕煩人，一定要做好每件事。」Joyce的大熱歌曲《女神》中，黃偉文為她寫了一句「不要低頭，光環會掉下來」，正好是其寫照。她說：「以前最驚喺條街度，一多人我就唔敢同人有眼神接觸，真係好似我要低住頭做人。」

「開心果」欣宜曾經有過一段不愉快的經歷，令她想放棄唱歌。

欣宜（左）與香港田徑代表呂麗瑤示範做簡單運動。

覺得圈外人較踏實

有自信的女人是最美麗，可是身為「女神」的Joyce不心急拍拖：「可能因為依家我人生好開心，未試過有咁固定嘅朋友圈子，工作同生意都算係順利，冇嘢要去填補。」從小在外國長大的她其實鍾情亞洲人：「溝通好重要，如果嗰個人能夠講廣東話同英文就最好，同埋我比較鍾意圈外人，覺得比較腳踏實地，我成日覺得娛樂圈嘅世界係just a game，不過都係順其自然啦。」

另外，欣宜昨日與與香港田徑代表呂麗瑤出席活動，欣宜透露10月於九展Star Hall舉行處女演唱會：「我會飛去一度地方拍啲嘢到時播。（拍三點式？）唔會咁益你哋，等紅館先啦。（又搵許廷鏗做嘉賓？）佢唔嚟就該死，佢上次開騷做咗佢嘉賓，今次還禮啦！佢嗰部分都好好睇。（叫佢着三點式？）到時大家睇。」

化妝：Samuel@江中平化妝室

髮型：Milk Chan & Morris@Xenter

場地：HMV Bar & Restaurant

文：音樂組　

攝：司徒國榮