周柏豪怕曱甴 靠女友保護
堂堂大男人周柏豪形容曱甴是他的「死敵」，自爆非常驚曱甴，直認女朋友比他大膽得多，能夠英勇徒手拍死曱甴，讓他變得愈來愈依賴，如果要他跟成堆曱甴拍戲，除非出到一億，否則他都過不到心理關卡。
周柏豪前晚出席在黑暗中獻唱的音樂會，並擔任壓軸表演嘉賓，同場嘉賓還有鍾舒漫（Sherman）、鍾舒祺及鄭欣宜等，柏豪稱今次是第二次參與，記得第一次是在三、四年前，但今次比第一次感覺更驚，他覺得人愈大就愈多害怕的東西，又驚高，又驚黑，又驚死，本身有幽閉恐懼症的柏豪，對黑麻麻環境都怕，最怕是焗，尤其是困(車立)，更自爆曱甴是他的「死敵」，他說：「如果遇到曱甴就大鑊，我會搵個窿爬走！（如果拍戲臨時加你拍唔拍？）困(車立)拍過，如果要同曱甴拍戲就要睇出嚟效果有幾大先決定。」
誤踩「地雷」彈走
柏豪曾經為拍戲瞓過垃圾山，他稱當時全身滿布烏蠅，問到假如換轉是曱甴纏身？柏豪即說：「梗唔得啦！（真人騷呢？）都唔得。（出一億都唔制？）吓，一億呀，如果咁都唔接，阿媽阿爸會鬧我，鬧我衰仔。（怕爸媽鬧多啲？）係，咁我唔驚曱甴啦！」但柏豪承認真的好怕曱甴。
相反女朋友對曱甴完全無懼，柏豪坦言：「佢可以徒手拍死佢(o架)，就係一個依賴性，我一路驚，佢一路幫我捉，但如果佢都驚，我就逼住要捉囉！」柏豪再自爆日前打完波後跟朋友去食飯，但中途因為曱甴而走人，他說：「食食吓，明明腳底冇嘢，但點解踩落去會有好似踩爆花生感覺，即刻知乜事，即彈走，連飯都食到一半就走咗，遺棄班朋友，啲朋友仲話啱，叫我連對波鞋都唔好要畀埋佢哋。」事後回家柏豪第一時間為波鞋消毒。
鍾舒漫祝福舊愛
此外，Sherman提到前男友吳浩康日前受訪時直言很對不起舊愛，還希望得到原諒，她直言事情已過去不會計較。提到吳浩康已有新歡，並沒有遵守承諾等Sherman回心轉意，她說：「從來冇話邊個欠邊個，每個人搵到自己幸福就要捉住，我都會替佢開心。」同場的欣宜表示因為首次在黑暗中演唱，所以每首歌音樂和歌詞是十倍的震撼和感動。
文：音樂組