新任媽咪鄭家雯中途揼奶
ViuTV選美節目的14位參賽者昨日身穿泳裝鬥身材，默認拍拖的「索爆沙律」張沛樂靠E Cup蕩胸「Big」走包到冚的「巨胸翠如」鄧月平！同場還有不少另類佳麗，其中健美小姐馬倩宜自認雙性戀，要參賽搵女友；而的骰人母鄭家雯則被爆曾在節目途中揼奶，夠晒爆點！
今次ViuTV選美節目《美選D.n.A》不設參賽限制，吸引各式各樣的參賽者參加，昨日14位參賽者身穿泳裝出席記者會，明顯燕瘦環肥乜都齊，要靚有靚，要另類有另類，非常出位！當中兩位F Cup佳麗R鄧月平（Larine）及P「紋身女」石希露（Olga）成為焦點，但Larine竟密冚好身材，相反Olga勁騷4吋事業線！至於宅男女神E「沙律」張沛樂則釋放E Cup導彈，走路時非常蕩漾！
輸身材贏勇氣
「沙律」自爆因腰傷沒有運動3星期，腹肌已不夠之前明顯，對於被揭與電影男新人林耀聲拍拖，她顯得不知所措，但默認戀情：「拍拖好自由，如果冇拖拍咪仲大鑊，即係我性格唔掂？」而密實Larine則搞Gag表示因「翻風」才收起身材：「事業線唔係最重要，仲有其他嘢可以騷。」
而幾位「非典型」佳麗獲評判郭偉亮（Eric）及火火點名力讚，包括「人母」D鄭家雯（Jennifer）、自認整容的F趙詠瑤（Kimi）及「健美小姐」O馬倩宜（Happy），火火說：「Jennifer係媽媽級，但好有勇氣參加，拍拍吓節目仲走咗去揼奶！雖然身形輸蝕，但內在美超班，又夠拚搏！」Jennifer直認參選初期剛生BB兩個月，仍在餵人奶階段，她自認1米46身高輸蝕，望憑勇氣及毅力突圍。
Happy自爆雙性戀
至於被封「女版步驚雲」的Happy身材健壯，感覺Man爆！她自爆是雙性戀，曾跟同性及異性拍拖，不排除追節目中的女仔：「Feel到仲有女仔係（雙性戀），但未深究。（乘機揀女友？）好難揀呀！個個都不得了！」而Kimi直認兩年前曾整容及豐胸，最近壓力大減磅，上圍縮了一Cup，但不會為選美再豐胸。今次節目顛覆一般選美傳統，稍後會分組到東京及芭堤雅取景，透過真人騷表現佳麗的真性情。
文：影視組