超高酬金拍內地騷？祖藍：有排未輪到我
藝人王祖藍、楊千嬅、梁漢文及蘇永康等昨晚在電視城錄影曾志偉遊戲節目《我愛香港》。近日盛傳內地有關方面出招，限制藝人參與影視製作收取過高片酬，經常返內地賺人仔的祖藍被指早前演出綜藝節目，酬勞高達千三萬人民幣。昨晚他說：「梗係唔係啦，呢啲係唔正確嘅資訊。（仲要高啲？）商業秘密喎，總之我合理同抵用。（有關方面點名話周迅片酬過高。）最緊要物有所值啫。（擔心受影響？）我不嬲都唔係最貴嗰個，一路『片』落嚟，有排都未輪到我﹗」
專蝦翠如家姐
祖藍又表示繼續有內地節目演出接洽中，稍後會返無綫拍劇集《老表3》，今次落實會有新角色加入。而昨晚玩遊戲時，他代表「沙田區」出賽，勾起不少兒時回憶：「嗰時我同容祖兒、黃翠如家姐同班，仲死蝦翠如家姐，搞到對方喊晒，大個咗好後悔，依家前事不計，大家係好朋友。」
當年「華星三寶」楊千嬅、梁漢文及蘇永康則代表「銅鑼灣區」出賽，三人均表示難忘當年報名參加新秀，蘇永康笑謂：「我嗰屆報名有4,000幾人，由利舞臺排到出波斯富街電車路，真係好誇張。」楊千嬅則指自己經常於銅鑼灣流連，囝囝也在該區上學。
文：影視組