定欣 君馨 睇結局爆喊等攞獎！
近期熱爆的無綫劇集《城寨英雄》前晚大結局，不負眾望錄得最高35.2點收視，逾228萬觀眾捧場，暫成為今年最高收視的大結局。胡定欣、王君馨和劉佩玥等前晚喊住睇大結局，問到定欣該劇收視好，會否增加冧莊視后的信心？她表示較希望攞到「最佳劇集」。至於君馨，她則謂朋友均看好她攞「最佳女配角」！
無綫人氣劇《城寨英雄》前晚大團圓結局，終極惡人「楊竹鑾」歐瑞偉被圍攻下終於死在陳展鵬及袁偉豪拳下，大快人心；「拳佬」陳展鵬與「刁蘭」胡定欣亦有情人終成眷屬。大結局收視不負眾望，錄得最高35.2點，最高收看人數逾228萬，成為今年最高收視的大結局，劇集平均收視則是33點。不過，以全劇成績計，《城》平均收視27.2點排第二，未能衝破榜首《公公出宮》全劇平均28點的紀錄。
等陳展鵬回港慶祝
《城》結局暫成為全年最高收視的大結局，眾演員也睇到感動爆喊，胡定欣自爆相約拍檔睇大結局時變成喊包：「我知道有咁好收視，喺街都大叫咗出嚟，真係好開心同感動，多謝觀眾支持，證明大家付出冇白費囉。睇番自己整蠱陳展鵬嗰場戲，我真係喊得好勁，心情亦太過複雜嘞，喊到停唔到。」她希望待陳展鵬登台回港再慶祝一次。
講到網友指定欣濕吻展鵬後即搵出歐瑞偉弱點，網民戥王君馨死得唔抵，定欣笑言：「好好笑，網友有好多呢啲幻想！大結局播到咀拳佬呢一幕，大家都睇到咿嘩鬼叫。」網民認為拳佬死才夠淒美，她笑說：「大家都想happy ending，如果真係死晒，怕有網民會投訴！」可會增加冧莊視后信心？她說：「想攞『最佳劇集』多啲，因為呢個獎屬於所有人。尋晚（即前晚）返到屋企真係瞓唔着，內心忽然好空虛，又翻睇多一次結局。」另外，胡定欣昨晚相約「胡說八道」一班成員打邊爐聚會，還留言：「今晚冇《城寨英雄》睇好失落，惟有搵班姊妹慶祝吓。」
監製唔排除拍續集
王君馨對於收視報捷說：「嘩﹗好誇張，真係超高。尋晚食飯睇歐瑞偉死嗰場戲，大家都喊。我入行9年都未試過有個角色咁深入民心。（有冇信心攞『最佳女配角』？）個個都話等住睇我攞獎，真係好開心同感動，但自問未夠資格，今次好多人幫我，有獎係大家畀我嘅。」監製文偉鴻被問到會否考慮開電影及續集？他說：「唔排除任何可能性。」此外，星期日播出的《奧運精英顯風采》及《奧運精英約定你》分別錄得平均4.7及4.6收視點。《城》劇則接到六宗投訴，不滿多角色死及劇集血腥、暴力。
此外，劉佩玥、伍允龍與吳家樂昨晚錄影《我愛香港》，劉佩玥對劇集高收感意外；伍允龍則指收視好代表觀眾鍾意套劇，希望再有機會拍TVB劇。對於多角色死，伍允龍說：「係監製嘅哲理，佢想帶出訊息有危險先會珍惜身邊人。」講到網友談論劉佩玥逼爆上圍一幕，她說：「希望大家唔好放錯焦點，撕衫戲大家都冇將重點放喺我身材度。」吳家樂認為劇集是誠意之作，希望能攞「最佳劇集」。
文：影視組