洪欣慘被老公踩水桶腰肥師奶

藝人洪欣與女兒張晞彤、鍾麗淇、徐榮與女兒徐心怡、Soler成員Dino一家等昨日出席奶粉品牌活動。首次帶同兩歲半女兒出席活動的洪欣，穿上白色透視連身裙，身材fit爆，她表示女兒平時好怕醜，所以有少少緊張。

要囝囝叫「家姐」

提到早前去旅行晒比堅尼照被網民讚keep得好，她表示老公張丹峰唱反調：「佢話我keep得唔好，肥師奶，水桶腰，佢話佢睇得好清楚，唔滿意，我有得食就食咗先，我唔怕肥，佢叫我唔好食咁多。」她透露自己不煙不酒，沒有特別保養秘訣，生活簡單。

提到兒子張浩鋒生得靚仔，會否被認錯姐弟？她笑言：「佢細個嗰陣同佢玩，叫佢叫我做家姐，佢就喊，話你唔做我媽咪喇，好大反應。」問到會否為兒子添多個妹妹？她直言老公第一個反對，因為壓力大：「佢推晒工作陪足我十個月，佢話男人要出去做嘢，由生到坐月都陪我，所以一坐完月佢就去做嘢。」

Dino與太太帶埋兩個可愛囝囝赴會。	徐榮抱住囡囡包包，一臉慈愛。	鍾麗淇指9個月大的細女鍾意游水。

鍾麗淇扔B潛水

同場的鍾麗淇被問到早前帶細女Michela游泳，她說：「三、四個月大已經扔佢落泳池，要佢潛水。（唔驚？）佢好鍾意，大女見到都要游，水泡都唔要，一齊游，我喺側邊睇住。」她透露9個月大的細女愛玩水，大女五歲就游泳做治療。

文：名人組